Falar en B

La mio collaboración de los xueves en Noche tras Noche de la RPA

El mi lio d'esta selmana ye que, ensin dame cuenta, toi falando fora de la llei… Non lu sabía pero asina ye… Yá se que vais dicime. Tu como toos… Cuando te pañen nun renunciu: Non lu sabía… Non m’alcuerdo…Soi medio fatu… Eso ya ta mui vistu.

Tará pero nun ye'l casu. Llevo tola vida falando como creo que tengo que falar, como falaba mio güelu, pero esti día, cuando lleí esi twit de Cherines, la presidenta del PP Asturianu, nel que presumía de llograr que namás se pudiera usar el castellán nel parlamentu autonómicu… Dixi: Meca… Pa m’idea toi falando en B. Si porque Cherines ta mui al tantu de la corrupción… Sobre tou de la llingüística. Buenu y de la otra tamién, porque, agora, el PP asturianu lleva la contabilidá como ta mandáu, non como antes de que llegara ella, que yera un caos.

Asina que yá ven… Yo ensin enterame y falando en B. Que nun ye falar en baldre… ye falar en negru, de tapadillu. Como comprar el periódicu con un billete de Quinientos…. Cosa que pue facese pero que mosquia a les autoridaes. Anque buenu, non tantu como falar nel parlamentu asturianu na nuesa llingua, que ta prohibíu. De mou que nun s'estrañen si cualquier xueves sintonicen Noche tras Noche y nun oyen los mios llíos selmanales.

Viendo cómo ta la cosa, yo yá non me plantego defender l'usu del asturianu, namás me plantego que puea siguir falándolo ensin que m'escuerran o me metan en chirona. Confórmome con que non me traten como alló polos años sesenta del sieglu pasáu… Con que por orde del cura, o l'autoridá competente, que nesti casu sería Cherines, nun se presente una pareya de la Guardia Civil y me detenga en cualesquier chigre.

Fora d'equí, quiero dicir allá per Galicia, Cataluña o'l País Vascu, seique nun s'entiende, pero lo que pidimos nun ye que fomenten l'usu del asturianu, ye que non lu prohiban. Nun desaxero… Imaxinen como tará la cosa que la presidenta d'ún de los principales partíos, una asturiana nacía en Xixón, presume, ante los asturianos y el públicu, en xeneral, de prohibir l'usu del asturianu nel parllamentu autnómicu.

Podía toma-ylo a mal pero, pa min, que va ser ignorancia. Tien que ser eso porque Cherines, dau'l partíu nel que milita, barrunto que será cristiana y devota de la Virxe de Cuadonga. Si asina ye tendría que conocer un llibru d’Agustín de la Villa, publicáu en 1923, que se titula Remontóse la Santina. Un llibru nel que diz Agustín que la nuestra vixen falando con otra, nun sé si la Pilarica o La Moreneta, protesta porque los asturianos s'empeñen en rezar d'otru moldu que nun sía na so llingua, nuna xirigoncia que nun entiende. Y pon en boca de la Santina que los asturianos tienen que rezar y pidíi les coses como Dios manda. O sía, n’asturianu… Siéntolo por Cherines… Pero si La Santina diz que falar como Dios manda ye falar n’asturianu yo voi facéi casu, anque me detengan. 

Milio Mariño