Aviones y voladores

La mio collaboración de los xueves nel Programa Noche tras Noche de la RPA

El mi lio d'esta selmana ye que veréis… Yá empezaron les fiestes de prau y a les dificultaes conocíes coles que s'atopaben los organizadores hai qu'añidir otres nueves que puen facer que finalmente desapaezan. Asina que nun taría mal que les autoridaes, los políticos de turnu, punxeren en valor les romeríes y solliviaren los problemes que traviesen les asociaciones que les entamen.

Un problema son les tases que-yos reclama la Sociedá Xeneral d'Autores, que nel so enfotu recaldatoriu impón unes tases que suponen un frayo económicu de les asociaciones y el mieu d’atopase con una situación que desconocíen y qu'amenacia'l futuru d'estes celebraciones.

Al preciu final de les orquestes hai que sumar un 7%, de cuenta que les comisiones más pequeñes, les que caltienen vivos los festexos de localidaes con pocos habitantes, soporten una carga bien pesada. Tamos d'alcuerdu en que'l canon d'autores ye llexítimu pero tendríen que tener en cuenta que se trata de fiestes populares y atender lo que se-yos reclama dende dellos ámbitos, que ye que roblen convenios onde se contemple un descuentu pa les romeríes entamaes por asociaciones de festexos y asociaciones vecinales.

Otru problema que denuncien los organizadores d'estes fiestes ye'l consumu d'alcohol fora de les barraques oficiales… Ye'l famosu botellón, que fai que los que puxaben polos chigres y daben unes perruques a la comisión ufierten menos dineru.

A too esto hai que sumar les cargues fiscales, les torgues alministratives, la falta de renovación xeneracional nos equipos organizadores y que la crisis amenorgó'l poder adquisitivu de los vecinos…

Y por si nun fuera abondo queda lo último… Agora resulta qu'AENA prohibe tirar voladores nun radiu de 40 kilómetros alredor del Aeropuertu d'Asturies. Yá lo que nos faltaba… Qu'a toles torgues que dicíamos amiesten que tampoco se puen tirar voladores.

Que yo sepa tola vida se tiraron voladores nes fiestes y los aviones siguieron aterrizando en Ranón ensin nengún problema. Nun sabemos a santu de qué salen agora con esta milonga…

Si hai daqué que pon en valor el branu n'Asturies ye la folixa, son les fiestes de prau… Asina que nun queda otra que defender eses celebraciones y a esos colectivos que trabayen de manera desinteresada y con munches dificultaes para sacar alantre les fiestes.

Al paecer, lo qu'apuntaron dende l'aeropuertu, cuando-yos apertaron un poco, faciéndo-yos ver lo absurdu de la midida foi que, n’últimu casu, coordinen el disparu de los voladores pa que nun coincida col vuelu de los aviones.

Menuda idea… A mi ocúrreseme otra meyor…. Que sían los aviones los que respeten la tradición de les fiestes y coordinen el vuelu cola procesión del santu o los festexos del día. Sedría más seguru y más práutico… Nun va tar el paisanu esperando, col volador na mano, a que pase l’avión y el capitán diga: fueu al trapu… Home calla

Milio Mariño

Mariguana, una yerba que nun ye pación

El mio camentario de los xueves en Noche tras Noche de la RPA

El mi lio d’esta selmana ye que mañana vienres llegará al plenu de la Xunta del Principáu una iniciativa presentada por Podemos pa intentar una regulación integral del usu y consumu de la mariguana y tamién de les aplicaciones terapéutiques dende’l puntu vista profesional y téunicu. El débate de la propuesta quieren que concida con otres paecíes desarrollaes nos distintos parllamentos autonómicos y col débate abiertu dientro de la ponencia sobre drogues establecía nel Congresu los Diputaos.

Hai otros grupos políticos que, más o menos, proponen dalgo paecíu. Esquierda Xunia, que ye una formación pionera nesta materia, ya la llevó nos sos programes eleutorales en delles llexislatures. Igual que Ciudadanos, que cuenta con una proposición non de llei, que presentó’l pasáu mes de mayu n’Asturies, si bien refierse a la regularización de los usos terapéuticos de la planta ensin entrar na discusión de los lúdicos.

El Principáu, por boca del conseyeru de sanidá Francisco Bustos, diz que carez de competencies pa regular esta materia, pero la mariguana roza la mayoría nel parllamentu asturianu, pos ente los tres grupos que la promueven sumen 17 diputaos de los 45 que tien la cámara.

Peteciome camentalo porque paezme importante. Diréis que falo de cualquier cosa y nun pue ser qu’entienda de too. Por supuesto que non… Nin entiendo nin lo pretendo pero tengo una opinión. Y esa opinión ye la que quiero compartir con vosotros… Caún tendréis la vuestra… Y nesi sentíu pienso que ye necesariu que les instituciones se pongan a l’altura de la sociedá… Una sociedá que, na idea que yo tengo, apuesta de forma mayoritaria porque ye necesaria una normalización… Nun pue ser qu’esti tema se siga tratando, namás, en base a aiciones penales. Eso yá quedó desfasáu.

El prohibicionismu fracasó… Hai que ver les coses como son… Siguir prohibiendo la mariguana nun conduz a na. La prohibición namás valió y val pa potenciar el narcotráficu y convertilo nun poder económicu y criminal.

Yá sé que ca vez qu’oyimos falar de mariguana, quien más quien menos aperia una sorrisuca… Alcuérdase de qu’esa yerba nun ye pación y fai un biecu simpáticu… Pero toos pensamos lo mesmo. Pensamos que, mialma, nun ye tan mala como quieren facenos creyer les autoridaes y dalgunos médicos… Por supuestu que non… Por más que quieran ponéi portielles el campu, el futuru camina por onde dicimos nos… Camina hacia una regulación llegal. Si queremos exemplos ehí tan los Estaos Xunios, onde na menos que 23 estaos ya la tienen llegalizada.

Lo que pasa que la cultura de la mariguana sigue entendiéndose como de rebeldía, inconformismu y desobedencia civil. Pero si quitamos eso, la realidá ye que tratase d’una planta, como’l romeru, el tomillu, los ayos, o les cebolles… Una planta que ye melecina. La diferencia namás ta en que cualesquiera que quiera mercala un pue dir a la plaza… tien que dir al mercáu negru. Y, a estes altures, nun ye plan. Eso tien qu’acabase. Y acabaráse más pronto que tarde. Yá lo veréis.

Milio Mariño

Los primeros asturianos

El mio camentario de los xueves nel Programa Noche tras Noche de la RPA

El mi lio d’esta selmana ye pa camentavos un par de cosines sobre cómo vivieron los nuesos antepasaos, los qu’andaben pequí fai 49.000 años… Qué, como quién foi ayeri….Camiéntolo porque tan trabayando nello un equipu internacional de científicos y la universidá d’Uviéu.

Quien más sabe ye Marco de la Rasilla, profesor de la Universidá d’Uviéu qu’analizó dellos yacimientos arqueolóxicos como’l de la cueva del Sidrón, cerca de Borines, en Piloña, onde en 1994 unos espeleólogos atoparon restos humanos que resultaron ser de trece neandertales emparentaos ente sí, que podemos dicir son los primeros asturianos.

Según les investigaciones ya los testimonios atopaos, l’home de Neandertal vivió por tolo que güei ye Asturies. Vivió regular porque aquellos antepasaos nuesos teníen una vida bastante curtia… vivíen non más de cuarenta años. Y eso que comíen de too… yeren omnívoros. Comíen lo que podíen atropar: dende mofu hasta setes ya piñones. Nun hai constancia de que pescaren o coyeren mariscu, más alló de lo que pudieren pañar al descuidu. Tamién comíen güevos y miel. Y tamién prauticaben el canibalismu que, al paecer, foi'l desgraciáu destín de los restos qu’apaecieron na cueva del Sidrón. Pero nun hai por qué alarmase, el canibalismu, yera entós, una zuna normal.

Depués de los neandertales llegaron los sapiens. La llegada, a Asturies, del homo sapiens hai qu'asitiala alrodio de fai 37.000 años. Los primeros sapiens yeren, igual que los neandertales, cazadores y recolectores, pero gozaben d’una serie de ventayes evolutives sobre los anteriores, y, en concretu, d’una capacidá mayor pa consiguir recursos y una mayor especialización na caza. Los sapiens, amás, tamién recolecten meyor y, a midía que va corriendo'l reló cronolóxicu, a la fin del Paleolíticu, tamién deprendieron a pescar ya mariscar, eso sí, namás nos ríos y a la oriella la costa. Nun hai constancia de que s’aventuraren mar adientro.

Yá entós facíen dalgún mueble y decoraben les cueves. De lo segundo tenemos el testimoniu de cueves como la d’Altamira o la de Tito Bustillo, auténtiques capiyes sixtines del paleolíticu. De muebles ya utensilios, hai toa una reciella ellaborada non solu en piedra o madera, sinón tamién con materiales como asta, güesos o conches.

Daquella xente, bien d’años depués, vinieron los astures. Qu’entá nun tá claru quien yeren. Ta claru que vivieron enantes que los celtes y que llueu xuntáronse con ellos. La preba ye que los castros d’equí, d’Asturies, son circulares y los del restu d’España son cuadraos, por eso albidren que los astures son anteriores a los celtes.

Dicíen los romanos, que los astures yeren fuertes, brutos y valientes y qu’avezaben a tar de mui mal humor… Mialma nun sé por qué… Porque-yos dolíere la cabeza nun debía ser… Los científicos aseguren qu’atoparon evidencies de que royíen corteya del chopu que contien muncho acedu salicílicu, l’ingrediente activu de les aspirines… Yá véis qué coses…

Milio Mariño

Cultura a esgaya

La mio collaboración de los xueves nel programa Noche tras Noche de la RPA

El mi lio d’esta selmana trata de que les fiestes del branu y los Premios Princesa d'Asturies van tomando forma. Nesi sentíu, tenemos noticies que paecen interesantes y a mi diome por xuntales.

Per un llau tenemos que’l diseñador valencianu, establecíu en Barcelona, Javier Mariscal va facer el cartelu del 81 Descensu Internacional del Sella. Y per otru que Víctor Manuel será’l pregoneru de les fiestes de San Xuan en Mieres. Dos figures de renome pa dos fiestes de prestixu.

En cuantu a los premios yá se van conociendo los premiaos. Esta selmana conocimos que la selección neozelandesa de rugbi ye premiu de los deportes pol so valor icónicu, los sos estraordinarios éxitos deportivos y pol so exemplu de solidaridá, deportividá ya integración racial y cultural… Eso diz el xurao. Lo curioso sedrá saber si la danza y los berríos concidirán nel escenariu con Les Luthiers, premiu Princesa d’Asturies de Comunicación y Humanidaes.

Les Luthiers toos sabéis quien son… Son seis paisanos sobre un escenariu, traxeaos de smoking y xugando al humor absurdu, al empar que refináu ya intelectual cola escusa de la música clásica. Son un pocu como Monty Python y un pocu al estilu Woody Allen...

Si m’entrugáis como foi que me dio por xoncelos… Pues que se yo… Paecióme que lo de Mariscal y Víctor Manuel diba per un llau y lo de Les Luthiers y la selección All Blacks per otru. Creo que Mariscal, el creador del famosu Cobi, anque digan que tá n’hores baxes, ye too un luxu pal cartelu de la Fiesta les Piragües. Un cartelu que van presentar en Madrid el próximu mes de xuno, na sede del Comité Olímpicu Español y formará parte de los actos programaos pa celebrar les bodes de plata de les úniques Olimpiaes que se fixeron n’España.

Víctor Manuel, el cantante, compositor y músicu, que ye ún de los mierenses más queríos y famosos, debutará como pregoneru y dará’l pistoletazu de salía a los festexos el día 17 de xuno a les 19.00 hores na Casa la Cultura.

Pa depués del branu sedrá lo de los Premios. Nun sé yo como van organizar la cosa pero imaxino que la Selección neozelandesa de Rugbi baillará el haka, la famosa danza maorí, na plaza la Escandelera y a los Luthiers dexáranlos pa dientro del Campoamor.

Dios me llibre de criticar los méritos de los premiaos pero nun sé… Si xustifiquen el premiu los deportes, amás de poles fazañes deportives, polos berrios, el baille y l'himnu de la selección… Tamién podía figurar na terna de candidatos el Tuilla Club de Fútbol… Que tien un himnu que, por si no lo sabiáis, diz asina:

Ye nel Tuilla onde reina l’allegría... Ye nel Tuilla onde reina’l bon humor… Nun camudaremos de calter…. mientres tengamos un balón…

Nun desmerez en nada… Con cuatro voces y una migaya de promoción facíense famosos nun biribí.

Milio Mariño

Animalaes

El mio camentario de los xueves en Noche tras Noche de la RPA

El mi lio d'esta selmana ye por un casu que veréis… El Xulgáu de lo Penal númberu 2 d'Uviéu acaba de condergar a nueve meses de cárcel a un home por abandonar a una pollina en Llanes. El procesáu tendrá de pagar, amás, 1.004 euros a una clínica veterinaria que la atendió, anque nun pudo salvala pos la pollina morrió el 11 de marzu del añu pasáu. Tuviera dos meses a l’albentestate, abandonada na localidá de Lledias, ensin agua, nin comida, nin un llugar p’acovecese.

Entá me paez poca la condena y la factura que tien que pagar el dueñu de la probe burra. Yo, avezo a tar sollerte a los procesos por maltratu de los animales. Cas vez hai más casos y gústame que s'escuerran y se condérguen los abusos nesi sentíu.

De toes formes, queda muncho por facer pa que síamos un país civilizáu nel tratu colos animales. Van tener que pasar munchos años hasta que, nos encierros de San Fermín, sían los mozos los que salgan de la corrolada y los toros los que se dediquen a escorrelos, con un periódicu atáu al rabu y los cuernos dispuestos por si se desvíen de los cabestros. Y más tiempu entovía pa que, en Tordesillas, El Toru de Vega escuerra al asesín del toru del añu anterior y lu acose, nun caleyón ensin salida, hasta que consiga cornialo bien corniáu y llogre como recompensa los sos atributos viriles.

Nun toi poniéndome radical. Abogo por que los animales tengan derechos, como'l de nun ser torturaos, y non lu maquillo con coses como dexa-yos que tengan accesu llibre a determinaos sitios. Quiero dicir que considero prioritariu que nun sufran maltratu y qu’eso nun tendría de tapase con otres coses.

Por exemplu, faise muncha publicidá de que ca vez son más los hoteles qu'almiten perros y anuncien servicios específicos pa ellos: dende spa hasta psicólogu. Tamién va n'aumentu'l númberu d'establecimientos y tresportes públicos que permiten l'accesu de mascotes acompañaes polos sos dueños.

Los madrilanos yá puen viaxar nel metro col so perru. Y más vos digo. Inditex, va tiempu qu'informó que cualesquier pue allegase a les sos tiendes acompañáu de la so mascota, siempres qu'esta nun torgue que'l restu de los veceros se siéntan cómodos. Una alvertencia que me paez ociosa porque: ¿A qué persona pue cafia-y qu'un mastín apruza nel probador de la tienda, cuando ta probándose unos pantalones, o que daquién coincida, al so llau, na cola de la caxa con una boa enroscada al pescuezu o una iguana engaramada nel llombu? Tien que ser mui repunante pa fadiase por daqué asina.

Camientolo porque lo mesmo que digo una cosa digo la otra. Necesitamos menos midíes pa la galería y más aplicanos notres coses. Non me gusta que maltraten a los animales… Pero, al empar, tampoco ye pa dexayos que tengan llibre accesu a tolos sitios. Yá sé que nun tien que ver pero paez que va amestáu. Per una parte concedemos-yos más derechos y por otra siguimos dexando que los maltraten nos ruedos y nos encierros.

Milio Mariño

Trabajar para no vivir

Milio Mariño

Hay semanas que cunden mucho. Esta pasada fui a dos manifestaciones y lo hice con las manos en los bolsillos; sin pegatinas ni pancarta, bandera o globos. Anónimo. Como un bulto que ocupa medio metro cuadrado que, a lo mejor, son dos para los organizadores y unos centímetros para la Policía Local. Allá ellos. Para mí lo importante es sentir la sensación íntima de compartir el motivo de la convocatoria, sean quien sean los convocantes.

 Dicen que caminando se piensa mejor porque supone una desconexión que nos permite escapar de la idea de identidad y la tentación de ser alguien. Y, a lo mejor fue por eso que mientras subía por la calle La Cámara se me ocurrió que ganarnos la vida no debería ser tan difícil. Que, a estas alturas, debería bastar con tener un empleo y trabajar ocho horas. Pero resulta que trabajar y cobrar un salario es un privilegio y hacerlo durante ocho horas y, además, tener vacaciones un lujo que solo pueden permitirse unos pocos.

Hemos progresado tanto que aquello de que con un salario podía vivir una familia es prehistoria. Ahora se necesitan dos, como mínimo, y que los abuelos hagan de becarios y cuiden a los nietos durante doce horas al día.

Olvídense de vivir para trabajar y desechen, también, la idea de trabajar para  vivir. En lo que estamos es en trabajar y que no llegue para vivir. Los últimos datos sitúan a nuestro país como el tercero con más trabajadores pobres de la Unión Europea, solo superado por Rumanía y Grecia.

La gravedad del asunto es que el trabajo no sólo es un medio para conseguir dinero es, también, una forma de vivir. Llega a convertirse en el eje sobre el que cada uno vertebra y regula su vida y su sistema social. Por eso resulta aterrador que uno de cada seis trabajadores no gane para vivir y que los otros no sepan si al final de mes les despedirán o no puedan organizarse para defender derechos básicos como quedar de baja cuando están enfermos, disfrutar del permiso de paternidad o maternidad, o tener un horario digno.

La España que viene, y ya está aquí, es un país muy distinto al de hace unos años cuando, al parecer, vivíamos como no nos correspondía vivir. Cuando salíamos a cenar una vez al mes, podíamos disfrutar de un par de semanas de vacaciones y teníamos un coche y una casa propia. Aquello llevó al país a la ruina. Así es que empieza a construirse la España del futuro, donde se irán de vacaciones y comprarán casas y coches los que tengan dinero. Los demás tendrán que ir sobreviviendo cada cual como pueda. Los datos favorables del paro, tan pomposamente aireados, reflejan eso, que si nuestros hijos quieren tener un empleo será a costa de ser más pobres que sus padres.

Lo sorprendente es que la gente no se lo cree. Aún espera el milagro. Por supuesto que no voy a decir que por manifestarse el 1 de Mayo se arregle el problema pero, en muchos casos, no solo se es pobre por cómo se vive sino también por cómo se piensa. La abulia y la complicidad con las que asistimos a esta debacle son asombrosas.  Nunca, como ahora, hemos sido tan dóciles. No nos dejan ganarnos la vida y apelamos a que sea lo que dios quiera.

Milio Mariño / Artículo de Opinión / Diario La Nueva España

Otru añu caleyando por Uría

El mio camentariu de los xueves en Noche tras Noche RPA

El mi lio d'esta selmana nun pue ser otru que'l de la Selmana de les Lletres Asturianes. Mañana vienres, a les siete y media la tarde, voi dir pali que pali, dende la Estación de la Renfe, cai Uria alantre, hasta'l teatru Campoamor, entemecíu ente un montón de xente, quiciabes non muncha, cola que voi xuntame otru añu más pa reivindicar la oficialidá del asturianu. Pa pidir el respetu y la reconocencia del nuesu idioma porque creo que tengo la obligación de defender una llingua que nació va mil años y quier vivir otros tantos, o más.

Asina ye. Niégome a escaecer les palabres coles que los mios antepasaos foron nomando lo qu’afayaben los sos güeyos… La xente, les coses, los pueblos… Tou. Niégome a matar eses palabres que, pa mi, son sagraes y quiero que los mios ñetos les conozan y les usen. Quiero que l'asturianu siga viviendo nellos. Y quiérolo ensin imposiciones… Ensin que signifique imponer a naide que lo tenga que falar… Pero esa llibertá que doi pa falar, caún, como quiera, tamién la quiero pa lo nueso. Pa que non m'obliguen a tener que falar nun idioma que nun ye'l míu.

Díxilo cuantayá y non m'importa volver díxilo. Dígo-yos, a los que manden, que nun val siguir mirando pa otru llau cola sida falsa de que la llingua asturiana malpenes tien sofitu social y nun cuenta con una mayoría abonda que la sofite pa ser oficial. Ehí tán los estudios fechos polos espertos, que lu desmienten bien desmentíu… Dicen que los asturianos queremos mayoritariamente que l'asturianu se reconoza como llingua oficial. Pero como dixo aquel: de pocu val lo que digan los espertos si los inespertos son los que tomen les decisiones.

Asturies pue ser perfechamente billingüe… Nun pasa nada. Bonu si pasa, pasa que munches coses vamos poder diciles pol so nome.

Perdonar el tonu y la parrafada. A lo meyor igual pensáis que toi enfadáu… Nomenón, que voi tar… Solo que me da rabia qu'haya tantu pa munches coses… Que s'esbardie tiempu y dineru  atendiendo a lo ayeno y que sían roñosos pa lo nueso… Qu'a los que manden se-yos enlléne la boca diciendo que son asturianos y depués s’achánten a la hora de defender daqué tan importante como'l nuesu idioma.

Nun sé si mañana vamos ser cuatro mil o cuatrocientos los que vamos colar, un añu más, cai Uria alantre pero naide va ser a soterrar esta llingua si siguimos na llucha entretexendo'l respetu y la reivindicación intelixente de lo que significa falar n'asturianu. Y lo meyor de too ye que voi ser ún de los más vieyos de los que vaigan mañana a esa manifestación. La mayoría son xente mozo perbién formada y con mui bon humor. Asina que yá lo sabéis, mañana a les siete y media si pasiáis pola cai Uria hasta'l Campoamor váis tener la oportunidá de ser y sentivos más asturianos que si esperáis, en casa, a ver la manifestación pola televisión.

 Milio Mariño