El mi lio d'esta selmana nun pue ser otru que'l de la Selmana
de les Lletres Asturianes. Mañana vienres, a les siete y media la tarde, voi
dir pali que pali, dende la Estación de la Renfe, cai Uria alantre, hasta'l
teatru Campoamor, entemecíu ente un montón de xente, quiciabes non muncha, cola
que voi xuntame otru añu más pa reivindicar la oficialidá del asturianu. Pa
pidir el respetu y la reconocencia del nuesu idioma porque creo que tengo la
obligación de defender una llingua que nació va mil años y quier vivir otros
tantos, o más.
Asina ye. Niégome a escaecer les palabres coles que los mios
antepasaos foron nomando lo qu’afayaben los sos güeyos… La xente, les coses,
los pueblos… Tou. Niégome a matar eses palabres que, pa mi, son sagraes y
quiero que los mios ñetos les conozan y les usen. Quiero que l'asturianu siga
viviendo nellos. Y quiérolo ensin imposiciones… Ensin que signifique imponer a
naide que lo tenga que falar… Pero esa llibertá que doi pa falar, caún, como quiera,
tamién la quiero pa lo nueso. Pa que non m'obliguen a tener que falar nun
idioma que nun ye'l míu.
Díxilo cuantayá y non m'importa volver díxilo. Dígo-yos, a
los que manden, que nun val siguir mirando pa otru llau cola sida falsa de que
la llingua asturiana malpenes tien sofitu social y nun cuenta con una mayoría
abonda que la sofite pa ser oficial. Ehí tán los estudios fechos polos
espertos, que lu desmienten bien desmentíu… Dicen que los asturianos queremos mayoritariamente
que l'asturianu se reconoza como llingua oficial. Pero como dixo aquel: de pocu
val lo que digan los espertos si los inespertos son los que tomen les
decisiones.
Asturies pue ser perfechamente billingüe… Nun pasa nada.
Bonu si pasa, pasa que munches coses vamos poder diciles pol so nome.
Perdonar el tonu y la parrafada. A lo meyor igual pensáis
que toi enfadáu… Nomenón, que voi tar… Solo que me da rabia qu'haya tantu pa
munches coses… Que s'esbardie tiempu y dineru
atendiendo a lo ayeno y que sían roñosos pa lo nueso… Qu'a los que manden
se-yos enlléne la boca diciendo que son asturianos y depués s’achánten a la
hora de defender daqué tan importante como'l nuesu idioma.
Nun sé si mañana vamos ser cuatro mil o cuatrocientos los que
vamos colar, un añu más, cai Uria alantre pero naide va ser a soterrar esta
llingua si siguimos na llucha entretexendo'l respetu y la reivindicación
intelixente de lo que significa falar n'asturianu. Y lo meyor de too ye que voi
ser ún de los más vieyos de los que vaigan mañana a esa manifestación. La mayoría
son xente mozo perbién formada y con mui bon humor. Asina que yá lo sabéis,
mañana a les siete y media si pasiáis pola cai Uria hasta'l Campoamor váis tener la
oportunidá de ser y sentivos más asturianos que si esperáis, en casa, a ver la
manifestación pola televisión.
No hay comentarios:
Publicar un comentario
Milio Mariño