Lleña al fueu

La mio collaboración de los xueves nel programa Noche tras Noche de la RPA

El mio lio d'esta selmana ye polos incendios. Por esa cantidá d’incendios que llegó a afeutar a venticuatro conceyos ya caltener activos, de forma simultánea, na menos que 39 focos distintos. Los cálculos apunten a que van ser más de 2.000 les hectárees quemaes nos cuatro grandes incendios del occidente. El de Grandas de Salime; los de Bustantigu y Villalaín, nel conceyu d'Ayande, y el de Valvaler nel conceyu d’Ibias.

Dempués de too, menos mal que camudó'l tiempu. Que dexó de facer sol y vientu y llegó un pocu d'agua porque si non inda tendríemos una bona parte d'esos montes quemando. Naide pon en dulda que nun se regatiaron esfuerzos, pero les quemes yeren tantes que nun se podía emprestar a toes l'atención que precisaben.

Tamién el branu pasáu se produxeron quemes como estes… Quemes que tienen tola pinta de ser intencionaes. Pero resulta que no que va d'aquelles quemes a les d'esta primavera non se fixo na… El gobiernu del Principáu yá nun ye que nun se-y ocurriera na sinón que nos traxo un cambéu de la Llei de Montes, aprobada pol Parlamentu asturianu fai malpenes un mes, a propuesta del PP, que permite l'aprovechamientu a les camperes quemaes.

Ye como echar lleña al fueu. Ye un disparate que yá se-y ocurrió a Rajoy cola criticada Llei de Montes de 2015 que dexa recalificar les árees quemaes pa mayor gocie y esfrute de los pirómanos.

El coronel de la Guardia Civil Javier Almiñana rellaciona les quemes col cambéu de la Llei de Montes, pero dende'l PP acaben de salir al pasu diciendo que nun tien na que ver, que pensar eso ye un disparate.

Disparate, pienso yo, ye dexar que puea aprovechase la superficie quemada… Antes prohibíase precisamente por eso, pa evitar tentaciones.

Convién tener en cuenta qu’estes quemes son n'abril, non n'agostu… De mou que tien qu’haber dalgo nun funciona na preservación de los montes y les zones rurales… Que, por ciertu, son los valores que más apurren a la maltrecha economía de la rexón, como atractivu turísticu.

¿A qué dediquen la so xestión, y el dineru de toos, si nun son capaces de protexer los montes con más eficacia…

Nun se discute qu'hai pirómanos, siempres los hubo… Pirómanos qu'aprovechen la nueche pa dexar artefactos nel monte más o menos asitiaos, pa qu'enciendan a una hora… Eso sabese pero si amás ponemos l'aliciente de que les superficies quemaes puean aprovechase….

Namás tenemos que fixanos na Comunidá Europea… Según una norma, que se conoció esta selmana, la superficie afeutada polos fueos nun pue computase pa pidir subvenciones de los fondos.

Por qué n'Europa lo faen asina…. Y equí echamos más lleña al fueu?.... Mialma que non me lo esplico.

Milio Mariño