Fiestes que clamen al cielu

La mio collaboración de los xueves nel programa de la RPA Noche tras Noche

El mi lio d'esta selmana ye con delles fiestes. Llegó la primavera y vieno cola folixa de tolos años… Cola Selmana Santa, La comida na cai d'Avilés, Los güevos pintos na Pola, La Flor en Grau y una fiesta rociera qu'anuncien en Llanes, allá pa xunu, coincidiendo con San Xuan, y ta llevantando munches crítiques nes redes sociales.

Asina ye. L'Asociación de Xarres y Caballos del Oriente d’Asturies acaba d'anunciar el Primer festival Rociero de Llanes cola promesa de diversión a embute y el platu fuerte de dos actuaciones: Los Chunguitos y Azúcar Moreno. Ehí queda eso.

Munches de les crítiques arramaes n'internet acusen a los organizadores del festival rociero de competir coles sociedaes de festexos d'otres localidaes de la zona qu'esos díes celebren la festividá de San Xuan. Pero los organizadores de la fiesta andaluza deféndense y dicen que solo quieren ufiertar daqué distintu pa los llaniscos y los visitantes. Qu'a ellos tamién-yos gusten les fiestes tradicionales y qu'una cosa nun ta reñida cola otra.

Reñida nun sé si tará pero una Fiesta Rociera ye a lo nueso como un güevu a una castaña. Hai que reconocer qu'eses fiestes andaluces cada vez tienen más tirón equí n'Asturies. Pa muestra, ehí ta la esitosa Feria d'Abril de Piloña… Pero qu'esa fiesta convoque a muncha xente nun mos quita de dicir qu'esi tipu de fiestes van en contra de la nuesa cultura y suponen la perdida de la identidá asturiana.

Son fiestes que podríemos llamar artificiales, fiestes que nun respuenden a los usos y costumes nin a una demanda popular, sinón a la idea de facer negociu y yá tá. Lo cuál, analizáu dende'l puntu vista cultural, carez de too interés. De manera que ye de suponer qu'esos festexos nun tarán subvencionaos polos Conceyos, porque si destinaren dineru públicu pa ellos, amás de criticable sería de xulgáu de guardia.

Pos anda que nun tenemos coses que festexar n'Asturies antes d'importar una fiesta andaluza. Pero, polo visto, somos los meyores comprando lo que vien de fuera y los peores vendiendo lo nueso.

Dígolo como lo siento. Ablúcame que n'Asturies trunfen estes fiestes foranes. Dexo aparte'l sentíu relixosu non ensin antes cuntar que, por exemplu, tresformar la Virxe de La Cueva, nuna improvisada Virxe del Rocio paezme un pecáu tan grande que nun atopo penitencia que lu redima.

Toi d'alcuerdu en que cada vez celebramos más fiestes importaes. Ehí ta Halloween, que vien ser a lo nueso como si los americanos celebraren encierros de San Fermín poles cais céntriques de Nueva York.

Pero, fuera bromes… Mialma que nun ye lóxicu que n'Asturies se celebren fiestes rocieres nin Feries d'Abril. Paécenme atentaos contra la nuesa cultura, el nuesu patrimoniu y tamién el bon gustu. Si siguimos asina non m'estrañaría qu'a cualesquier se-y ocurra celebrar el 4 de xunetu… que ye’l día la independencia d'Estaos Xuníos. Son capaces…

Milio Mariño