¿Los catalanes son, daveres, pazguatos o sedrá que se volvieron lluellos?

Milio Mariño

Llámame l'atención que la respuesta a la situación de Cataluña y a la situación d'España, los asuntos más importantes que vive'l país, non solo sía distinta sinón contrapuesta.

Mientres nun casu ye'l pueblu'l que se manifiesta, frente al Congresu, pidiendo un cambéu radical nel quefer políticu, nel otru, el de Cataluña, son los políticos los que dirixen la revuelta.

¿Somos tan distintos? ¿Los catalanes son, daveres, pazguatos o sedrá que se volvieron lluellos?

Camiéntolo por qué, en Cataluña, lloñe de cuestionar lo que dicen, faen y proponen los políticos, dalgunos d'ellos chiscaos por casos de corrupción y responsables de retayar l'Estáu del Bienestar más inclusive que nel restu d'España, la xente suscribe lo que dicen y paez encantada coles sos propuestes.

Los catalanes entraron al trapu de los sátrapes y vividores qu'ostenten l'alministración del poder y aspiren a perpetuase, enmazcaritando les sos canallaes col chivu espiatoriu de que somos los españoles los que tenemos la culpa de too. Y los catalanes dan-yos la razón.

¿Va ser que son tontos? Yo creía que non, que yeren inclusive bien llistos pero agora yá tengo mios duldes. Lo bono del casu ye que falten apenes dos meses pa que s'esaminen y sepamos cómo anden d'intelixencia.

El puru de Rajoy

Milio Mariño

A min, que Rajoy fume un puru, pasiando por Nueva York, frente al Radio City Music Hall, non me paez mal. En tolos trabayos se fuma. Otra cosa ye qu'intente azorronalo. Qué tape'l puru cola mano y, envolubráu na fumareda del habanu, diga que los millones d'españoles que'l martes nun se manifestaron ye que tán al so favor.

Mire señor Rajoy, por min pue fumar, si quier, tres caxes de Faries, de les que facíen en Xixón, pero tontures les xustes.

De tontures yá ta bien. Yá va, abondu, sobráu. Yá devasó'l cupu de llamase a andana y poner los pies en Polvorosa cuando les coses se ponen fees. Yá lo vimos dicir que yera usté el que presionaba a la UE, enantes de viaxar alló alantrón pa esfrutar colos goles de la selección y agora vémoslo fumando un puru, poles cais de Nueva York, enantes de dicir, na ONU, que sofita l'Alianza de Civilizaciones, aquel inventu de Zapatero que tanto criticó y del que fixo bona risión.

Pa esos viaxes nun faen falta alforxes. Pa facer el tontu meyor facelo en casa. Si-y apetez dase un garbeu pue dir de la Moncloa a Alcorcón. Salnos más baratu a nós y usté aforrase la paliza del avión.

Esperanza solu sabe baillar cha cha chá.

Milio Mariño

Hai que pena me das, Esperanza por dios…

Dicíalo Machín, naquel famosu cantar. Y, equí, yera cuestión de tiempu que cantaren cha, cha, chá. A la fin va saliendo la verdá. Y lo que te rondaré morena porque, adulces, vamos dir conociendo detalles de lo que yá barruntábemos, qu'Esperanza Aguirre nun dimitió por causes personales nin por enfermedá, dimitió porque Rajoy obligóla a dimitir, dempués del duru enfrentamientu que caltuvieron los dos, el pasáu 4 de setiembre, nel despachu del Presidente na cai Genova, onde s'oyeron voces ya insultos de la llideresa que nun son pa reproducir.

La causa del enfrentamientu fueron los alcuerdos qu'Esperanza asumió unillateralmente col grupu que quier construyir Eurovegas, qu'entepasaben notablemente les sos competencies, comprometiendo a dellos Ministerios y dexando a Rajoy como mera comparsa nesti ensundiosu negociu.

Con too, l'espolín nun foi solu por celos políticos sinón porque nesta rodiella anden metíes delles families del PP: L'home de Cospedal, el xenru d'Aznar… Soraya, Gallardón… Y cada familia quier sacar tayada. De cuenta qu'a non muncho tardar vamos dir conociendo detalles de la griesca familiar y de los intereses, mamandurries y pretensiones de cada cuál.

Los Diputaos nun quieren enterase de lo que val un peine

Milio Mariño

Ayer mesmu, concidiendo cola protesta del 25-S, tratábense nel Congresu les partíes de los Presupuestos Xenerales del Estáu que recueyo de siguío y que, mialma, nun solucionen el problema económicu pero que sigan conseñando, pal 2013, dellos privelexios demuestra que los nuesos Diputaos y Diputaes entá nun s'enteraron de como ta'l patiu y de que nun tamos dispuestos a siguir tragando sapos y culiebres.

La Cámara Baxa va gastar el próximu añu 6.750.000 euros en viaxes, 19.285 euros per diputáu. Esti capítulu de desplazamientos nun inclúi dietes, inclúi los trayeutos n'avión, tren y los peaxes de les autopistes. El kilometraxe, 600.000 euros al añu, va aparte y, per primer vegada, inclúyese una partida de 30.000 euros p'abonar l'aparcamientu nos aeropuertos, a pesar de qu'acútense otros 850.000 euros pa taxis (cada diputáu cunta con una tarxeta de taxi con un saldu de 2.500 euros).

Capítulu aparte merecen les multes qu'anicien los vehículos oficiales, que van ser abonaes pol Congresu, pa lo cuál inclúyese nos Presupuestos una partida de 7.000 euros, la mesma qu'en 2012.

Habrá quien piense que son gastos necesarios y que criticar esto ye dir contra la democracia pero a mi paezme que, siendo como ye'l chocolate del loru, basta y sobra pa demostrar que los nuesos diputaos y diputaes viven d’espaldes al pueblu.

Vuelven los virus y los pioyos, como tolos años, en setiembre.

Milio Mariño

A la vuelta de vacaciones atópome con que la Conseyería del Principáu tien inmovilizaes 18 vaques, pol aquello de qu'una d'elles tien el mal de les vaques lloques, y tamién con que nel Reinu Uníu acaben de detectar un nuevo virus, el SARS, síndrome respiratoriu agudu y grave.

Nos dos casos, dicen les autoridaes que, de momentu, nun hai qué preocupase, que van esperar a ver como evoluciona l'asuntu.

Si vos digo la verdá tampoco m'estraña muncho, tamos na seronda y en, seronda, vuelven los virus, como los pioyos a los colexos. Lo que m’estraña ye que too seyan virus. Si andes mal del estómagu virus, si tienes cagalera virus, si espirries y tuses virus…

A lo meyor, qué sé yo, estu de que los virus vuelvan en setiembre tien dalgo que ver colos productos que sollivien y curen los 300 virus de la gripe qu'anden por ehí al debalu. L'Amantadina, por exemplu, foi un productu aprobáu pola FDA (l'axencia estadounidense de la melecina) en 1976, y la so patente ta vencida, polo que pue adquirise muncho más baratu.

Una caxa d'Amantadina cuesta 3,15 euros. Una de Tamiflú 17,39 euros. Claro que Tamiflú ye de Roche. Y quiciabes por eso, por ser de-Roche, ye'l que más utilicen tolos Gobiernos.

Nun sé a vosotros pero a min chóquenme les concidencies. Chocame que los virus y los pioyos vuelvan, tolos años, en setiembre.

Lo duru y lo blando a propósitu de Rajoy y Merkel.

Milio Mariño

Vaya rodiella que me formé con eso de que Rajoy, echando mano a les midíes dures que tomó, intentare convencer a Merkel, pa que-y concediere un rescate blandu. Vaya llío del copón colo blando y lo duru, con que si ye más fuerte, o meyor, unu qu'otru.

Si me dieren a escoyer yo escoyería un rescate duru y unes midíes blandes pero nun soi Rajoy y, a lo meyor, él fa-ylo al aviesu por inorantón. Porque nun sabe que l'agua ye más fuerte qu'un peñascu nin que l'amor pue cola durez hasta dexala como la repla.

Tampoco tien de saber, porque nin él nin Merkel, debieron lleer a Nyce, que'l poder blando ye la capacidá d'atraer y convencer, mientres el poder duru consiste en forzar y coaccionar utilizando'l dineru como mediu de coacción.

Rajoy pue siguir, si quier, presumiendo de dureza pero asina como lo llargo y lo curtio fórmense unu del otru y l'asosiegu acaba sometiendo a lo nervioso, lo tienru y lo débil siempre acaben venciendo a lo duro, por más que lo duro azorrone y trate de faese'l fuerte.

El retratu d'Ávarez Cascos

Milio Mariño

Nun sé yo sí por que la cosa ta mal, de verdá, o por vengación, el Ministeriu de Fomentu decidió rescindir el contratu que tenía col pintor Antonio López pa que-y fixera un retratu a Álvarez Cascos que, según lo roblao, diba salir por 190.000 euros.

Una vez aprobáu l'encargu, ye’l retratáu el qu'escueye al pintor y Cascos escoyó a Antonio López, el maestru del hiperrealismu, con quien va tiempu charré nun par de vegaes y tuvi l'honor de que me punxera al tantu del so viaxe de novios, que fixo a Mieres, cuando la fuelga del 62, agospiándose en casa d'una cuñada, porque nun tenía dineru.

Ana Pastor diz que Cascos yá foi retratáu cuando yera vicepresidente del Gobiernu, y que dos retratos en sede ministerial igual abulta escesivu.

Pa nun entrar en polémiques, Antonio López, que ye tan bon pintor como humilde, candial y bona persona, manifestó que va facer el retratu anque nun-y lo paguen. Queda por ver onde lo van colgar, si nel Ministeriu Fomentu o Cascos piensa donalo pa que lo cuelguen nel Principáu.