¿Cuantu pagaríes tú por una entrada de fútbol?

Milio Mariño

Nun sabéis cuantu me fastidía tener que da-yos la razón a los alemanes, a los franceses y a tou mariasantísima, cuando salen col aquello de que nun tenemos chapeta. Caime la cara de vergoña viendo que los precios de la final de la Copa del Rei, que va xugase en Madrid el vienres, son los más caros d'Europa.

Comparando los nuesos precios colos de les finales de Copa de les otres cuatro competiciones europees (Inglaterra, Alemaña, Francia ya Italia) nun s'averen nin de lloñe. La entrada más cara de la final inglesa costó 136 euros, la de los alemanes 125 y la d'Italia 120, pero equí n'España, les graes alta y baxa cuesten 220, el primer anfiteatru 245 y 275 la entrada de tribuna.

Ehí queda eso. Llueu, al día siguiente, vamos per ehí llorando y llamentando que tenemos más de seis millones de paraos y nun podemos cola crisis.

Y, voi dicivos otra cosa. Nun creáis que los de la Federación, los clubes o quien fuera, el que punxo'l preciu les entraes, ta barrenáu o chifló de repente. Al ritmu de venta que lleven, too apunta que'l Bernabeu tará llenu hasta la bandera.

La solución p'acabar cola fame ye comer inseutos

Milio Mariño

Nun sabíemos cómo salir d’esta y, nun descuidu, llegaron los de la FAO, un organismu de la ONU, cola solución p’acabar cola fame nel mundu. ¿Queréis comer?... Entrugaron.. ¡¡Pos comer mierda. Bonu, en realidá, nun dixeron eso, dixeron que comiéremos mosques, formigues, mosquitos, cucaraches, grillos, saltapraos, guxanos, aviespes… Hasta 1900 especies d'inseutos que, según la citada entidá, y sofitándose n'estudiu, realizáu en collaboración cola Universidá de Wageningen (Países Baxos), contienen la mesma cantidá de proteínes y minerales que la carne de xata y les grases más saludables.

Cuando vieron que s’armaba la de coyer intentaron arreglao. Sacaron un comunicáu nel qu'esclariaben que nun taben diciendo que la xente comiere bichos. Que, a cencielles, queríen dicir que los inseutos yeren un recursu alimenticiu fácil d'atopar, práuticamente gratis o bien baratu y entá por esplotar. Acabaron de xodelo porque punxeron como exemplu que n'África y n'Asia yá hai millones de persones que lleven tiempu comiéndolos.

Lo siguiente, non vos estrañe, ye que, d’equí a un par de meses, Rajoy quite'l subsidiu de 400 euros porque viendo que la xente, ensin que-y cueste un duru, pue preparar una parrillada de mosques, formigues y grillos, gastaríalo tou en vicios.

Los ricos tan delgaos y los probes cada vez más gordos

Milio Mariño

Nun digo nada nuevu si digo que la obesidá va n'aumentu y que casi toos tamos más gordos de lo qu’aconseyen los médicos. Lo que yo nun sabía, y por eso lo traigo equí, ye que dellos estudios demuestren que, en Europa y nos Estaos Xuníos, los probes tán más gordos que los ricos.

Y más que se van poner porque según el profesor Adam Drewnowski, de la Universidá de Seattle, “la obesidá va dir en aumento, pos ye la resultancia tóxica d'un ambiente económico que ta diendo a peor”.

Quier dicise que cuanto más probe yes más gochaes comes y más engordes. Pa que veáis lo que son les coses. De mou que, ensin que nos diéremos cuenta, la gordura pasó de ser un diferencial d'opulencia a un síntoma de probeza.

Nun ye por dámeles de llistu pero yo yá venía notando que los ricos avecen a tar nel so pesu y toos bien morenos. Lo que non se m'ocurriera foi rellacionar la obesidá cola probitú. Igual ye que toi un pocu gordu y mialma me fastidia que, viéndome, cualquiera puea imaxinar como ando de perres.

De mala educación

Milio Mariño

Toi por apostar que lo primero que seguramente fadrá, el siguiente Gobiernu qu'asoceda a esti, o a otru, del PP, sedrá anular la Llei d'Educación Wert y sustituyila por otra que tampoco pautará cola oposición. Llevamos asina dende va cuarenta años y lo que te rondaré morena porque, polo visto, nun se trata de conteníos formativos tratase de conteníos ideolóxicos, a los que, como nesti casu, súmase lo relixoso.

Lo sensatu, lo que tendría que facer cualesquier bon gobernante, seya d’isquierdes o de dreches, sedría formar estudiantes llibres, non manipuliaos, que reciban una enseñanza veraz y puean decidir por sí mesmos. Pero lo que busquen, los que faen estes lleis, nun ye que los estudiantes tengan una formación meyor, ye que piensen como ellos.

Asina nos lluz el pelo. Si España yá taba de lo más atrasáu d'Europa en materia d'educación, agora con esta Llei vamos dar un pasu de xigante, pero pa atrás.

Inventado nueves formes de protestar: el Cansinismu y l'Atracu Musical

Milio Mariño

Prestame pola vida que la xente nun se quede de brazos cruzaos, qu'estrume la imaxinación inventando nueves formes de protestar. Nun va ser too quemar ruedes, tirar voladores por un tubu o boles d’acero con un gomeru.

Tampoco quiero dicir con estu que nun comprienda nin participe de les razones qu’emburrien a protestar asina, quiero dicir que, delles veces, suple más y ye menos arriesgáu protestar d’otra manera que nun seya la tradicional.

Ayeri mesmu afayé dos nueves formes, d’estes que dixi, que me llamaron l’atención: el Cansinismu y L'atracu Musical.

El Cansinismu consiste en facer les xestiones habituales nun bancu pero a un ritmu más lentu, pagando con céntimos, faciendo ingresos d'un euru a diverses ONGs, actualizando la llibreta o pidiendo información sobre préstamos.

L'atracu Musical, podéis velo nun videu de youtube, inauguróse ayeri nuna sucursal de Bankia, en Lavapies, onde un grupu de xente xoven, formáu por una tuba, dos trompetes, una guitarra, cantante y coros, interpretó La Bankia dexónos ensin un duru.

Tamién hubo otres aiciones bien vistoses, como un home en bragues, blanques y d’encaxe, que saludaba a los veceros del bancu a la entrada de la sucursal.

Pa que llueu digamos que nun hai imaxinación y bon humor. Ha-ylo a pesar de la que ta cayendo. Y eso tien muncho méritu.

Meyoramos nuna cosa: nesti Gobiernu hai más fatos que nel de Zapatero

Milio Mariño

Lo de Rajoy, nel Congresu, dirixéndose al Presidente del Gobiernu, podría ser una anécdota si nun fuera que yá son munches les metedures de pata. Entamando porque plasma al nun entender la so lletra y siguiendo pol aquello de que tou ye mentira salvo delles coses.

Los ministros y ministres tamién anden a la tema en babayaes ya tontures. La esplicación de Cospedal merez figurar na antoloxía del disparate. Lo de Fátima Bañez, pidiendo-y a la Virxe del Rocio qu'interceda pa solucionar la crisis ye pa nota. Lo de Jorge Fernández rellacionando l'albuertu con ETA, nun tien nome. Lo que dixo Wert sobre la Educación pa la ciudadanía tamién ye antolóxicu. Y lo d'Ana Mato, Gallardón y Montoro, el risitas, venga dios y lo vea.

El casu que nun fai tantu la xente qu’agora gobierna y tolos medios conservadores chungábense de Zapatero y del escasu nivel de delles ministres como Bibiana Aido y Leire Pajín… Pos si que ganamos col cambéu. Estos son muncho más fatos. Y non me ciega la ideoloxía, refiérome al saber tar y a la eficacia nel cargu.

Ye peor el remediu que la imputación

Milio Mariño

Cristina, de momentu, sálvase. El fiscal, los abogaos del Estáu y l'abogáu particular consiguieron que fixera efeutu la so pócima llegal y desimputaron a la Infanta, pero tou apunta a que'l remediu va ser peor que la enfermedá. Yá lo ye porque lo más sensatu, pa la imputada, yera que se presentare delantre'l xuez y dixera: Equí me tenéis, nun tengo nada que tapecer.

Nun lo ve asina'l PP, qu'aplaude la marcha tras, nin la Infanta Elena, que diz que ta allegre, nin la Casa Real, qu'agora calla, non vaya ser que se-y escape la risa floxa.

Tampoco lo ve'l PSOE, que vuelve a la fórmula tonta del respetu a les decisiones xudiciales como si acatales y respetales torgara d'opinar sobre elles. Asina nun hai manera, asina cada vez hai más distancia ente les instituciones: Partíos Políticos, Monarquía y Poder Xudicial, y el pueblu pandu, un pueblu que ta siendo bien paciente pero qu'en cualesquier momentu pue españar.