Vieyos de cine y toros de película

Milio Mariño

Alló por Madrid la xente taba contenta con un programa que, va siete años, se punxera en marcha pa fomentar eso que llamen l'avieyamientu activu. Yá saben, incentivar a los vieyos pa que salgan de casa y s’esparzan un pocu.

El programa, Mayores de cine, basábase en que, los martes, los mayores de 60 años podíen dir al cine pagando namás un euru. Presentaben el DNI, pagaben un euru y podíen ver una película d'estrenu en cualesquier de les 450 sales acoyíes a esi programa.

Según los empresarios, el 77,22% de los espectadores de los martes yeren mayores de 60 años. Pero llegó González y mandó parar. La Comunidá de Madrid acaba dicir que nun apurre más perres, que’l programa costaba-yos un millón d'euros al añu y qu'hai otres coses meyores en qué gastalo.

Vamos poner que seya ciertu, nun digo que non, pero esi criteriu podíen aplícalo, tamién a los toros, que l'añu pasáu pañaron, del erariu públicu, na menos que 564 millones d'euros en subvenciones.

Daveres que nun punxe de más nin un céntimu, 564 millones llevaron los toros nel conxuntu del Estáu español. A una media de 30.000 euros les corríes y un pocu menos el restu de los festexos taurinos. Lo cuál fai que los toreros sían, na práutica, funcionarios públicos de carrera cobrando les pagues integres.

La tómbola del Gobiernu: ser español por 160.000 euros

Milio Mariño

Lo de facer español, y dai el carné nel actu, a tou aquel que compre una casa o un pisu que valga 160.000, o más, euros nun se-y ocurre al qu'asó la mantega. Hai que ser Subsecretariu, Direutor Xeneral o Ministru, del PP, pa que, depués d’escornate pensando, te bilten estes idees.

Hai que pensalo a conciencia pa ponéi esi preciu: más baratu nada. Trampes tenemos de sobra, asina que nun val comprar un horru, nin una chabola nin un pisu vieyu nuna barriada probe. La llende asítienla penriba de los 25 millones de pesetes.

Bien miráu ye una gran oportunidá pa los que lleguen en patera o, inclusu, pa los que lleguen nadando. Buenu y, tamién, pa nosotros porque yá lo dixo Rajoy: el que gasta perres nun pisu llueu compra una nevera, unos muebles…

Entovía non lo aclararon pero imaxino qu'a tolos que vengan censaránlos en Castiella... Ser español de Cataluña o del País Vascu sedrá muncho más caru… Y yá, nin vos cuento, ser asturianu… ser asturianu valdrá una millonada.

Nunca lo pensare pero igual nos sal más baratu, y nos trai cuenta, facenos alemanes o franceses… Tengo d’enterame cuantu cobren per ehí alantre por ser ciudadanu d'un país que tenga un Gobiernu con dos deos de frente.

Los vieyos políticos quieren ser xovenes

Milio Mariño

Arrastraos poles males noticies avezamos a entruganos, con testerona insistencia, a ónde nos lleven. La entruga nun ye nueva, bien ser la eterna y humana entruga qu’aveza a preparar el retruque d'acordies cola manera en que, a caún, va-y na feria. Pa los d'abaxo caminamos escontra'l desastre y pa los de riba, los que tienen dineru y poder, facémoslo pol bon camín anque tea yen de piedres y vaigamos descalzos.

Temos enriba o embaxo nuna cosa tamos d'alcuerdu, en que cuantu primeru salgamos del pozu meyor. La dulda ye si van ser los lliberales, qu'en realidá son los conservadores, o los progresistes, que ye como se faen llamar los d'esquierdes, los que nos sacarán d'esti sótanu.

Sían unos u otros, que pa lo que voi dicir da lo mesmo, barrunto qu’hai otra cosa na que tamién, casi toos, tamos d'alcuerdu: en que la mayoría de los nuesos políticos son dinosaurios. Y non yá pola so edá biolóxica, que podría ser, sinón porque lleven venti o trenta años nel cargu y nun tienen otres idees que les de va dos sieglos.

El promediu d'edá de los nuesos diputaos ye de 53 años. Lo cuál, de por sí, nun sedría invalidante, pero la edá biolóxica ensin una intelixencia fresca y renovadora que la ponga al día, fai que la persona avieye sópitamente y conviértase nun vieyu empeñáu en xustificar los sos pasaos errores.

Perhí entama la quiebra, pos los que tán gobernando vienen agora con que ye necesariu un cambéu na forma de facer política y en, práuticamente, tou, ensin dase cuenta de que son unos vieyos políticos que destacaron, precisamente, pola so resistencia a los cambeos y el so aponderamientu d'esi arume aneyo llamáu conservadorismu.

La contradicción, y la falta de llexitimidá nos sos pidimientos, parte d'ellos mesmos y de los postulaos que siempre defendieron, pos el cristianismu nunca sintió un especial interés polo que dicíen los vieyos. Pa los cristianos, la vieyera ye claramente un mal, un castigu divín que remanen en contraposición col Paraísu, que ye'l llugar de la eterna xuventú.

Nel so ideariu, na idea qu'ellos tienen de cómo tendría que ser la sociedá, un vieyu que gocie de bona salú y nun sía conservador, namás pue esplicase por una intervención diabólica.

Asina ye. La visión pesimista que tenemos de la vieyera heredámosla de los escritos del Antiguu Testamentu y la tradición grecorromana. Les regles monástiques, pilastra esencial de la Ilesia Católica, siempre emprestaron poca, o nenguna, atención a los sos monxos vieyos. La más célebre, la de San Benitu, asitialos na categoría de neños y encamienta amosar ciertes indulxencies con ellos, pero nun-yos apurre nengún privilexu nin ye criteriu pa la elección d'abades. Nun s'esplica por tantu que los nuesos vieyos políticos, refiérome a los conservadores pero tamién a los otros, nos vengan agora con que lo meyor pa salir de la crisis ye romper colo que tenemos y aceutar cambeos que dean al traste col nuesu pasáu. Esa propuesta, en bona lóxica, namás que-yos correspondería facela a los mozos progresistes. Nunca a los conservadores. La preba ye que los vieyos políticos, sobremanera los de dereches, siempre fracasaron na xera de poner el país al día.

Milio Mariño / Artículo publicáu en La Nueva España, en castellán

L'irreal Real Uviéu

Milio Mariño

Esti llunes pasáu publiqué un artículu en La Nueva España que titulaba “Tomemos ejemplo del fútbol”. Paecíame, y sígue paeciéndome, curiosu que, con tola crisis que tenemos enriba, los equipos de fútbol sigan, como si nada pasara, xiblando tangos.

El casu que como la realidá ta dispuesta a dexate en ridículo a les primeres de cambeu, esta selmana apaeció'l Real Madrid y “donó” 100.000 euros al Ayuntamientu pa salvar al Uviéu. Y, dos díes más tarde, l'empresariu mexicanu Carlos Slim invirtió nel club 2 millones d'euros.

Vaya per delantre qu'allégrome nun sé cuantu de que'l Real Uviéu se salvare, pero eso nun quita pa que tea sosprendíu por cómo respondieron los aficionaos, apoquinando dineru, pol fechu de qu'un Club como'l Real Madrid donare 100.000 euros, y nun lo fixera pa denguna obra benéfica y porque un empresariu mexicanu invirtiera 2 millones nuna empresa que, hasta la fecha, foi un negociu ruinosu.

Ye pa suponer que'l Gobiernu del Principáu allegraríase pol Uviéu pero tará un pocu decepcionáu pol aquello de que tolos esfuerzos que tá faciendo p'atraer inversores y fortalecer el texíu industrial d'Asturies malditu si dan resultáu y perembargu esti empresariu, qu'invirtió 2 millones, reconoz que l'orixe de too esto debese a una chancia qu'oyó na Cope.

Mariano Franco y Soraya Carrero Blanco

Milio Mariño

El Real Decretu promovíu pol Gobiernu pa parar el drama de los desahucios nun ye más que la continuidá d'aquel códigu de bones práutiques qu'encamentaren a los Bancos y los Bancos tomaron pol pitu'l serenu.

Ye un un escarniu pa los que fueron o van ser desahuciaos porque viendo les condiciones nun basta con ser desgraciáu, hai que ser mui, mui, desgraciáu pa poder acoyese a lo que sedría, namás, una paralización temporal.

El resultáu de la midía, anunciada a bombu y platillu, sedrá que'l númberu de desahucios pasará de 500 a 497 diarios.

Al empar d'esti Decretu, el Gobiernu sacó otru que recueye una llimitación salarial pa los xestores del Bancu Malu, que nun van poder cobrar más de 500.000 euros añales, llimitación qu'estiende a los de les entidaes interveníes, que van ver llindáu'l sueldu a 300.000, según el Ministeriu d'Economía.

Estos dos decretos promulgáronlos al día siguiente d'una fuelga Xeneral y de que millones d'españoles salieren a protestar a la cai de forma civilizada y pacífica.

Viendo los Decretos, y los modales de la policía, mialma paez qu'en cuenta vivir nuna democracia vivimos nuna dictadura gobernada por Mariano Franco y Soraya Carrero Blanco.

El Gran Gochu

Milio Mariño

Fartucu de lleer babayaes sobre la güelga y lo que paso'l 14-N, ocurrióseme que podíemos relaxanos un pocu con esta hestoria verídica.

La hestoria ye la siguiente: Gonzalo, un xoven viticultor de La Rioja, necesitaba dineru pa etiquetar ya embotellar un nuevu vinu y allegóse a la sucursal de la caxa d'aforros del so pueblu, Fuenmayor, a pidir un creitu pero, según dixo, negaron-ylo.

Dixéronme que'l vinu nun ye un bien embargable, de mou que si quería los 6.000 euros tenía que llevayos un aval de los mios padres.

Paecióme ridículu, asina que pidí dineru a los amigos, llogré xuntar los 6000 euros y camudé-y el nome al vinu. Pensaba llámalo d’otra manera pero llamélo Gran Cerdo en honor del tipu que me negó'l creitu porque, conmigo, mialma se portó como un gochu.

Nun sé si habrá dalgún otru vinu con esi nome pero Gonzalo tampoco inventó la pólvora. Va tiempu que George Orwell dixo otru tantu en Rebelión na granxa:

Los animales, ablucaos, pasaron la so mirada del gochu al home, y del home al gochu; y, nuevamente, del gochu al home; pero yá yera imposible estremar quién yera unu y quién yera otru.

David y Goliat, una hestoria d’ayer

Milio Mariño

Ayer pela nueche, dempués de la manifestación, volví satisfechu a mio casa. Nun llevara denguna pancarta, nin pegatines, nin gorru, nin nada. Llevaba’l biecu de la razón na cara y creía que yera bastante.

Cuando acabó tou, y caminaba en silenciu escontra l'aparcamientu onde dexara'l coche, atopéme con un amigu qu'echó mano al bolsu y sacó’l teléfonu pa enseñame la foto d’esti neñu manando sangre.

Non mos diximos nada, tascamos la mollera y siguimos caún a lo nuestru. Pero, según diba caminando, viénome a la memoria la vieya hestoria de David y Goliat. Una hestoria que nun debió ser como nos la cuntaron, debió ser al revés.

El mocín refundiaría un morrillu que rebotaría na coraza del xigante y este, en cuatro galmiaes, algamaría al rapaz, valtiaríalo d'un garrotazu, pondría-y la bota nel pescuezu y los sos compañeros entainaríen a dai pataes, mientres él siguía suxetándolo y oyendo como berraba de mieu.

Alcordando esa hestoria llegué al aparcamientu y vi qu'había dos policíes faciendo guardia. Tuvi paráu un cachu a ver si dalgunu s’atrevía a mirame a los güeyos. Nun s'atrevieron. Debieron albidrar que llevaba nellos la señal del trunfu. Un trunfu tan minúsculo como la picadura d'un mosquitu nel culu d'un elefante, pero, pa min, bastante.