Dicíalo'l cuervu d’Esopo: tirar piedres dientro la xarra ye la única solución

Milio Mariño

Cuntaba Esopo qu'un cuervu que morría de sede vio una xarra con agua, pero tenía tan poca que nun yera quien a algamala col picu. El casu que depués de dellos intentos, al páxaru ocurrióse-y que la solución yera tirar unes piedres dientro pa que l'agua xubiere de nivel y asina poder beber.

Quixo la casualidá qu'ayer mesmu, Nicola Clayton y otros collacios del departamentu de Psicoloxía Esperimental de la Universidá de Cambridge dieren a conocer un estudiu nel que demuestren que los cuervos y los neños menores d'ocho años solventen el dilema d'Esopo con idéntica eficacia: al quintu intentu. Dicen los científicos que los dos, cuervos y neños, lleven incorporáu, por istintu natural y ensin falta de deprendelo, como funcionen les lleis de la física.

D’estu que voi dicir en Cambrigde nun dixeron nada pero a min chocame que los neños, cuando crecen, pierdan ese istintu y anden a vueltes con que si tirar piedres dientro la xarra ye la solución. Nun hai otra si nun queremos morrer de sede.

Otru escándalo pa plasmar pero este ye la bomba

Milio Mariño

Pedro Morenés, que güei ye ministru de defensa, yera, va cinco años, ún de los xefes d'Instalaza una empresa de Zaragoza que fabrica armes, municiones y bombes de recimu. El casu qu'España, el Gobiernu de Zapateru, firmó un conveniu internacional contra eses bombes y, como ye lóxicu, dexó de comprales.

Socedió entós qu'esi xefe d'Instalaza, el tal Morenés. denunció al Gobiernu por dexar de comprar les bombes y nun cumplir un contratu que teníen firmáu diba tiempu.

La denuncia siguió’l so cursu, el PP ganó les eleiciones y Rajoy tuvo la gran idea de nomar Ministru de Defensa al que fuere xerente de la empresa de bombes, armes y municiones, a Pedro Morenés, qu'agora como ministru va pagái a la que fuere la so empresa una indemnización de 40 millones d’euros.

La hestoria paez cuentu risa pero nun tenemos esa suerte, ye tan real como que tamos a 25 de xunetu, día de Santiago Apóstol.

La plantilla de la ilesia nun se recorta nin se privatiza nin dexa de cobrar la extra

Milio Mariño

Al Gobiernu y a la prensa, al paecer, non yos interesa ponenos al tantu de cuanta xente mueve la ilesia. Los medios de la drecha fabricaron datos falsos inflando’l númberu de políticos pero nun dixeron nada de los que trabayen pal cleru y cobren de los nuestros impuestos.

Picáu pola curiosidá toméme la molestia de dir recopilando datos, siempre oficiales, y ocurrióseme xuntalos pa tener una visión de conxuntu. De mou que lo qu’apurro equí embaxo ye la plantilla, sin contar los que trabayen nes oficines, de la Gran Empresa pública llamada Ilesia Católica:

Cures de parroquia.- 16.937. Capellanes Castrenses.- 110. Monxes.-38.730, de les cuáles 13.000 son de clausura. Frailes.-11.647. Profesores de Relixón.- 18. 216. Arzobispos, 14. Obispos, 52. Obispos Auxiliares, 8. Obispos eméritos, 37.

Total de plantilla, y ensin dengún ERE a la vista, 85.761.

Una sorrisa a propósitu de los impuestos

Milio Mariño

Dau que ye domingo, salió'l sol y yá tamos fartos de que nos amarguen el branu, ocurrióseme trayer a colación dellos impuestos que, entovía, nun se-y ocurrieron a Montoro y paécenme más orixinales que calcayos el 21 % a les llibretes de los guajes.

En Maryland, EE.UU, les cases paguen impuestos según los wáteres que tengan y en Arkansas los que llucen un piercing o un tatuaxe paguen un 6% más que los que nun tienen decorada la pelleya.

Nel sieglu XVII, en Inglaterra, pagaben impuestu los qu'usaben sombreru. Y güei, agora mesmu, en Irlanda y Dinamarca tan pensando poner un impuestu polos peos de les vaques, causantes según la FAO, del 18 % del efeutu invernaderu.

Perembargu, de toes les propuestes curioses la que más polvarea ta llevantando ye la del economista xaponés Takuro Morinaga, que propón que los que seyan guapos y solteros deberíen pagar más impuestos que los feos.

Rajoy ye un pagafantes convictu y confesu

Milio Mariño

Bastaron seis meses pa velo ensembre, Rajoy quiciás valiera p’alcalde pero nun ye líder nin sabe llevar un Gobiernu. Nesti tiempu nun fexo otra cosa que fabricar enemigos, enfotáu en qu’asina díbemos mirar pa otru sitiu y dexalo tranquilu.

A la faltosada de presumir que yera él, el que presionaba a los países europeos vieno esi rosariu de culpes que foi semando al debalu: la herencia de Zapateru, los sindicatos, les empreses publiques, les autonomíes, los conceyales, los funcionarios y agora, lo últimu, la Renfe y el Feve, qu’acaba ponelos a les pates de los caballos hasta qu’atope otru reu.

Nestos seis meses Rajoy nun dio una a dereches, nin a esquierdes, al centru, o a voléu, dio palos de ciegu, estrozando tol creitu q’una mayoría de xente punxo-y nes manes enfotada nes sos promeses.

Si tuviera dos deos de frente entregaría la ferramienta y dimitiría yá mesmu, pero como ta vistu que non los tien hai que llargalo cuantu primeru meyor. A ser posible enantes de que faiga una hecatombe.

Sí que se puede, cómo nun se va poder

Milio Mariño

Na manifestación d'ayer, en Xixón, munchos nun esperamos a la cabecera nin a les pancartes, llantámosnos na cai y fuimos, pasín ente pasu, hasta Begoña.

Al contrariu qu’otres manifestaciones nun había allegría nin aire festivu, había indignación. Rabia fría, llucida y racional. Una rabia que convidaba a responder, a esos vanidosos que sonríen y aplauden los retayos, que si creíen que díbemos a resignanos ye una evidencia más de que nun nos representen nin nos conocen. 

Tal como tán les coses, claro que vamos tener que sufrir pero sufriremos por defender lo nuestru, lo que tanto nos costó conquistar, non pol sacrificiu qu'esti Gobiernu nos quier imponer.

El Rei regalónos otru elefante pa la coleición

Milio Mariño

Qué dalguién trabaye cuando tendría que tar de baxa nun ye una fazaña ye una irresponsabilidá del copón. Pon en peligru la so salú y la de los demás. Por eso que nun-y veo la gracia a lo qu'ayer dixo'l Rei, quixo facese'l simpáticu y volvió a meter la pata hasta'l corveyón.

Pero nun ye solo eso, la faltosada va más alló. Hai que tomala pol exemplu que nos quier dar. Por esa ideya, puerca y clasista, de que la xente del pueblu nun tien otru aquello que trabayar anque te morriendo. Por esi mensaxe de que lo primeru y principal ye trabayar pal amu y señor porque l'amu ye quien nos da de comer y gracies a él podemos vivir.

En cuenta tar en Moscu taba meyor pasiando los ñetos. Vamos sobraos de simpáticos, lo que daveres echamos en falta ye xente con xaciu y sentíu común.