Les engarradielles en Nuechebona

La mio collaboracion de los xueves nel programa Noche tras Noche de la RPA

El mi lio d'esta selmana ye polo que, nestes feches, suel pasar en munches families cuando s'avera la Nuechebona. Por esa cena familiar que, en munchos casos, nun escurre como debiera o acaba n'espolín. D'ehí qu'estos díes abonden les alvertencies, los conseyos y les prevenciones.

Nun l'armes que te conozo. Non se t'ocurra falar de política, nin de fútbol, nin de la familia, nin de lo que fixisti nos tos años mozos. Nun vuelvas dicir que los de dereches son unos fachas nin cuentes esa hestoria de que les llibertaes y el bienestar que tenemos debese a lo que dalgunos lluchastis cuando yerais xovenes. Nun aportunes con eso de que, agora, los mozos son bovinos y l'universidá un pandorial onde pastien como oveyes. Escaezte de lo tuyo y d’esi conformismu qu'aportunes en denunciar. Fai un esfuerzu y tengamos la fiesta en paz.

Esos, o paecíos, avecen a ser los conseyos en munches families pa la cena de Nuechebona. Que nun se ponga sobre la mesa nin un solo tema que puea acabar en bronca. Ye lo que suel faese pero yo tengo duldes de que la prevención valga p'ameyorar la cena. Discusiones, a lo meyor nun hai, pero pue ser peor el remediu que la enfermedá.

Suponiendo que faigamos casu y guardemos al neñu traviesu que llevamos dientro, ya inclusive que'l tontu de la familia, qu'en toles families lo hai, se porte meyor qu'otres veces, l'esfuerzu por caltener una paz artificial pue facer qu'en cuenta d’una cena de Nuechebona paeza una convención d'estriñíos celebrando la so cena añal.

Falar, en familia, como si acabáramos de conocenos, diciendo cumplíos y frases feches pue provocar unos coldazos y aforfugones que te dexen ensin aliendu y hasta se te salten les llárimes. Pues facer la promesa de nun sacar los temes prohibíos y nun falar d'otra cosa más que de banalidaes pero paezme un sufrimientu innecesariu ya inútil.

Si, porque cuando casi tamos avezaos a los defeutos de cada unu, tenemos qu'empezar de nuevu como si arrendáramos una personalidá pa la cena. Y eso oblíganos a tar tol tiempu pendientes…. Perhí nun vaigas, curiáu con esi chiste, güeyu con esa tema…

La ilusión de los anfitriones, sobremanera de les madres y les güeles que son les que más sufren, ye que toos síamos felices y nun se xenere dengún espolín, pero buscar la felicidá neses condiciones ye como buscar un chiste nel discursu del Rei Felipe. Difícil, mui difícil…

Asina que nun sé…. Dios me llibre de dar conseyos… Namás apurro un comentariu… Lo ideal, creo yo, ye que cada unu se porte como ye y sía tolerante colos demás… Que toos nos aceptemos tal como somos… Nun ye muncho pidir…. Por eso pídovos que cenéis bien, síais felices y esfrutéis. Pasáilo bien

Feliz Navidá.

Milio Mariño