El pastor Rouco

Milio Mariño

Somorguiáu na esmolición por que nun se-y fora a desmandar el rebañu, el pastor Rouco dio dos ordes a los perros: Que nun dexaren el matrimoniu ente oveyos y que tuvieren sollertes a que les oveyes s'apariaren como ta mandáu y cumplieren trayendo al mundu corderos. Ye la llei de la selva, díxo-yos, y tenéis que facer que se cumpla.

El casu qu'a los perros nun yos fixo muncha gracia que Rouco viniere con nueves xeres. Yá s'avezaren a ver pareyes d'oveyos y, por eso, non se desmandaba'l fatáu. Taben más esmolecíos porque les oveyes entamaren a formar pequeños grupos y dedicábense a da-yos la murga inclusu cuando se metíen dientro la caseta. Pero Rouco, d'eso, nun quixo saber nada. Dixo qu'allá los perros, que cuntaben cola so bendición, pero que se defendieren como pudieren.