¿Por qué calla la ilesia?

Milio Mariño

¿Por qué esi silenciu cómpliz? ¿Por qué los cures y los obispos, tan activos contra'l matrimoniu gay, por exemplu, nun dicen nada de los desahucios, les preferentes, el paru, o les midíes que ta adoptando'l gobiernu, en contra los más desfavorecíos? ¿Ú ta Martínez Camino, esi polesu tan risonderu y simpáticu que siempre taba sollerte de salir al quite col anterior gobiernu?

¿Nun proclamen a los cuatro vientos que la misión de la Ilesia ye defender a los probes? ¿A qué bien, entós, esi escandalosu silenciu? ¿Cómo ye que nin los monaguillos gorguten?

Y otra cosa… Aparte d'a Dios, ¿a quién rinden cuentes? ¿Onde ta la contabilidá de la Ilesia, sabemos en qué y cómo gasta los miles de millones que recibe del Estáu? ¿Van incluyila na Llei de Tresparencia?

Yá sé que, pa un sábadu, son munches entrugues pero les respuestes barrunto que son bien fáciles.

Hai esclavos que trabayen pa nós

Milio Mariño

Les grabaciones realizaes con una cámara oculta de la fundación La Alameda, una ONG qu'acaba d'interponer una segunda denuncia penal contra Zara, prueben lo que sabíemos cuantayá: que les principales empreses de ropa y calzáu utilicen talleres d'esclavos pa fabricar lo que nos venden y compramos.

El casu qu’eses empreses, les mesmes qu'empleguen a persones que trabayen en condiciones infrahumanes por un salariu de miseria, son capaces de pagar una millonada a los actores, actrices y deportistes d'élite qu'anuncien les sos prendes.

Tou eso sabémoslo de sobra pero siguimos mercando la ropa y el calzáu que nos ufierten a preciu pala, o inclusu caru. Yo'l primeru. Sedría un hipócrita si dixere que non. Tolo más que faigo ye un xestu de fadio cuando, depués de mercalo, lleo na etiqueta que, lo que merqué, ta fecho nun país del tercer mundu… Eso ye tou.

Morrió una de les persones más xovenes d’España, un mozu de 96 años

Milio Mariño

Nun sistema corruptu la normalidá ye la corrupción, asina que llegamos al puntu de que cuando, peles mañanes, vamos mercar el periódicu si nun trai un escándalu gordu paez que nos falta dalgo.

Volvímonos asina de raros. Güei mesmu, ensin dir más lloñe, los periódicos traen la noticia de que morrió José Luis Sampedro y tol mundu ye a dicir que, a los 96 años, pue que fuere la persona más xoven d'España.

De toes, ye la única noticia que merez la pena porque les otres vienen ser lo de siempre. Qu'a Urdangarin nun se-y vaya poder embargar la millonada que cobre, nel emiratu de Hamad Jalifa al Thani, porque con esi país nun esiste conveniu d'estradición, taba cantáu. Que'l fabulosu xalé de Corinna lo pagare la Casa Real, esto ye, los españoles, dábemoslo por sabíu. Y lo de Camps y los traxes, otru tantu de lo mesmo. De mou que nun merez la pena siguir, güei la única noticia ye que morrió un home de 96 años, un rapaz como quien diz, que teníemos en muncha estima.

Descanse en paz y oxala nun s’alcuentre, por alló arribón, con Margaret Thacher

Y, Urdangarín a Qatar

Milio Mariño

Los que falamos asturianu sabemos perbién lo que quier dicir que Urdangarín vaya a Qatar. Quier dicir que'l Duque va camudar de país pero non de zuna porque Qatar, escritu con Q o con C, ye ordeñar que dicen en castellanu. Y nunca meyor dicho porque a eso va'l xenru del Rei, a siguir catando la vaca, esta vegada nuna finca que tien n'África un amigu del suegru.

Primero Estaos Xunios y agora África pero na: mándenlo onde lu manden, mientres non lu manden a tomar pol sacu, nun solucionen nada. Asina nun llaven la porquería, entafárrense más entovía. Y si a eso amestamos qu'a la Llei de Tresparencia, quieren pone-y cortines, peor pa la monarquía.

El domingu, 14 d'abril, sería un bon día pa que Urdangarín aprovechare a facer la mudanza y llevare con él a tola familia. A los fíos por supuesto, pero tamién a la suegra y al suegru.

Filosofía pa un sábadu d'abril

Milio Mariño

Fernando Savater, el filósofu y escritor vascu, yá xubiláu de la docencia, falo ayer n'Uviéu sobre la ética y la filosofía de l'aición, nuna sala hasta los topes de xente que lo siguió con muncho interés.

Ente les coses que dixo, reproduzo cuatro frases que me llamaron l’atención y quiciás puan sirvir pa la reflexón. Ehí van:

“La nuesa sociedá fabrica fatos, persones que viven namás pa sí mesmes, sapárense de la vida social y creen que puen salvase soles”.

“Lo importante ye escoyer pensando si lo qu'escueyes ye realmente lo que quies o lo que quieren los demás”.

“Lo peor de los políticos ye lo muncho que se paecen a los ciudadanos que los elixeron”.

“Llegó la crisis y tolos que yeren apolíticos volviéronse antipolíticos, pero naide decidió ser políticu, que ye lo que precisamos”.

Al paecer van poder lleenos los suaños

Milio Mariño

Yukiyasu Kamitani, y los sos collacios del Llaboratoriu de Neurociencia Computacional de Tokio, tán esperimentando con voluntarios humanos l'actividá celebral mientres suañamos.

Diz Yukiyasu que si llogren afayar el significáu de los suaños va avanzase enforma nel tratamientu de la velea y otros malecimientos acomuñaos al celebru.

Hasta agora, la posibilidá de lleer los suaños yera ciencia ficción, pero l'esperimentu, al paecer, ta dando bon resultáu. El sistema yá foi capaz de predicir el maxín oníricu con un 60% d'aciertu. Lo cuál quier dicir que van poder lleenos los suaños y saber el significáu.

Al contrariu qu’otros esperimentos científicos, pa min, nun ye denguna meyora de la ciencia, ye una mala, mui mala, noticia.

De toles maneres, tengo l'enfotu de que, si daveres lleguen a dar con ello, el celebru humanu aprenderá a suañar en falsu pa fadiar a esos científicos métome en too. Hasta entós quiciabes nun podamos torgar que llean los nuesos suaños, pero sí podremos neganos, supongo, a que nos digan el significáu de lo que suañamos.

Agora hai qu'iguar los delitos fiscales colos yogures

Milio Mariño

El Gobiernu acaba derogar la norma qu'establecía que los productos llácteos debíen tener un plazu llende de consumu, asina que d'equí p'arriba los yogures yá nun caduquen a los 28 díes de ser ellaboraos.

Lo primeru que pensé, cuando lleí estu de Cañete, foi que soi fatu, bien fatu, pos llevo años tirando yogures que siguíen na nevera y, según les autoridaes, nun yeren aptos pal consumu porque taben pasaos de fecha. Hasta ayeri mesmu nun yera seguro consumilos pero güei, al paecer, si que lo ye.

La midida xustifíquenla pa frenar l'espilfarru de comida. Lo cuál paez una, otra, tomadura de pelu, y yá perdí la cuenta de les que llevo contabilizaes.

Imaxino que dalgún diputáu de la oposición, sía del partíu que sía, tendrá la decencia de pidir que yá que los yogures nun tienen fecha de caducidá tampoco la tenga la financiación illegal de los partíos políticos, que prescribe a los cuatro años, y toos esos delitos y fraudes fiscales que queden impunes cuando pasa un tiempu.

Dígolo siempre, pero tengo que volver a dicilo: Nun sé hasta cuando nin hasta onde vamos aguantar