Un churreru, un kalashnikov y 50 millones

Milio Mariño

Un churreru, un kalashnikov y 50 millones podía ser el títulu d'una d'aquelles películes de Pajares y Esteso que, alló pelos años ochenta, pretendíen facenos rir. Pero nun se trata de nenguna película, ye la realidá mesma d'un día cualesquier d'esta España del PP que supera la llende del meyor relatu de ficción.

El milagru d'Andrei Petrov, el rusu qu'empezó de churreru y, en dos años, blanquió 50 millones d'euros, vien a engrosar la llista de milagros y socesos pa-anormales que protagonicen, a diariu, los miembros del gobiernu y del partíu nel poder.

La ministra Fátima Báñez emula'l milagru, orixe del so nome, y ve que daqué entama a camudar cuando'l paru llega a seis millones. El presidente Rajoy pierde la memoria y non solo nun alcuerda cuando faló con Bárcenas per última vegada sinón que, pa demostrar que tien la cabeza a páxaros, na so visita a Perú, dirixóse al gobiernu d'aquel país llamándolo gobiernu cubanu.

Y yá pa terminar colos socesos pa-anormales d’ayeri, merez mención especial qu'un xuez gallegu condenare a la ilesia pagar l'IBI de dos finques, nun pueblu d'Ourense, señalando na sentencia que nun pue considerase que la Ilesia Católica sía una entidá ensin fines de lucro.

Naide tira de la manta, toos s’abelluguen del fríu

Milio Mariño

A metá de la cuesta de xineru hai dos índices que van pareyos y xuben los dos a un tiempu: el paru y la corrupción. Mientres el Ministru de Facienda rinde cuentes nel Congresu pa dicir que nun sabe sí Bárcenas s’acoyó, o non, a l'amnistía fiscal, el paru xube hasta los seis millones y la Ministra d'empléu tampoco atopa esplicación.

El paru xube cuando tendría que baxar y la corrupción paez empeñada en demostrar que ye falsu que los corruptos sían solo unos pocos. Ayeri mesmu súpose qu'otru políticu del PP blanquió 1,6 millones d'euros cola amnistía fiscal de Montoro, que l'asesor de la Casa del Rei asesoraba al institutu Nos, d'Urdangarín, y que l'alcalde de Santiago de Compostela, Angel Currás de PP, que va nueve meses sustituyó al entós alcalde, imputáu por fraude fiscal, foi imputáu tamién y sigue tranquilamente nel cargu.

Tamos al entamu del iviernu, d'equí a que llegue la primavera entovía tendremos que padecer muncho fríu. La incógnita ye si siguirán tapándose unos a otros o si habrá dalguién que tire del cobertor y dexe a unos cuantos al descubiertu.

La sinceridá del ministru xaponés

Milio Mariño

Les declaraciones del ministru xaponés de finances demuestren qu’entovía hai políticos que falen claro. Taro Aso, qu’asina se llama’l puntu, ye sinceru a más nun poder. Nun anda con caxigalines. Dixo que les persones mayores tienen que dase priesa y morrer p'alliviar los gastos del Estáu.

“¿Por qué tengo que pagar poles persones que namás comen y beben y nun faen llabor?". Dixo Taro, que tien 72 años y nun se considera mayor porque, entá, nun se xubiló. Sigue trabayando, de ministru, y tien una salú de fierru.

Taro esplicalo too nunes declaraciones qu'ayeri publicó The Guardian. Nun se cortó un pelu. A lo que dicimos que dixo amestó qu'hai vieyos que se ven obligaos a vivir cuando lo que quieren morrer. Y, p’acabar la entrevista, dexónos con esta frase tienra y poética: “Yo espertaría sintiéndome mal si sé que'l tratamientu, de la mio enfermedá, ta pagáu pol Gobiernu".

Ye duru y brutal, pero lo que diz el nipón ye lo que piensen munchos ministros, presidentes de gobiernu y capitostes financieros. Ciertu que nos duel oyelo pero como dixo aquel: Ye lo qu'hai.

Como si fuere corriente pidíi un xustificante al camellu

Milio Mariño

El ministru d'Asuntos Esteriores, José Manuel García-Margallo, dixo ayeri que "España nun ta escesivamente mal asitiada nos índices de corrupción”. Lo cuál pue entendese de dos maneres: como qu'inda tenemos marxe, o como que nun tamos mui lloñe de la cabeza y con otru par de casos podemos ser los primeros y alzanos col campeonatu.

Si daquién tenía dalguna esperanza sobre les intenciones de Rajoy, y el so gobiernu, pa esclariar lo asocedío con Bárcenas yá ve lo que piensen los ministros y los responsables del partíu. Unos dicen qu'entá nun lleguemos al cupu de corruptos, qu'inda tenemos marxe, y otros que nun-yos consta que, nel PP, repartiérense sobres con dineru en negru.

Pa rematar la xera, anuncien demandes y piden que, los que falen de que nel PP repartíen sobres con dineru puercu, presenten pruebes per escritu. Qué llistos son los PePeros. Como si fora d'usu corriente que daquién firmare un recibí al camellu cuando-y apurre trés dosis de mariguana.

Salvar al cabu furriel

Milio Mariño

Lo del Cabu Furriel del PP empieza a paecese a lo del sociu d'Iñaqui Urdangarin. Ciertu qu’esti nun va perhí publicando correos como avisu a navegantes pero manda mensaxes. Yá mandó unos cuantos, de mou que nel PP saben que si, a la fin, acaba en cárcel seguro que la prepara mui gorda. Tien el llistáu de los que recibíen sobres con dineru, en negru, de les xeneroses donaciones d'empresarios y constructores agradecíos polos favores.

Hasta agora conformábase col despachu, el xofer, la secretaria, los abogaos, Trillo pa tapar buracos y les manes llibres pa siguir manexando la pasta. Teníenlo contentu. Llegó a pensar, inclusu, que con Garzón fora de l'Audiencia naide más revolvería la mierda. Pero la cosa complicóse. El xuez Ruz tomó'l relevu y revolvió más de la cuenta.

El problema ye cómo convencer al furriel pa que siga cola boca zarrada. Ye saber cuantu va pidir pol rescate. Cueye suponer que pidirá abondo, pero non solo en billetes, tamién n'especies. Hai quien diz que la llibertá nun tien preciu de mou que pidirá nun dir a la cárcel cueste lo que cueste.

Cuando la flor en culu amustia

Milio Mariño

Rajoy ye d'eses persones que nacen con una flor nel culu y lleguen a onde lleguen ensin que naide lo esplique.

Pero, un día, la flor amustia y nel floreru queda, namás, agua podre. Queda lo que siempre hubo, una persona foina y tramposa que miente más que fala y ye un desastre escoyendo amiguinos de l'alma. Mialma paez que tien pasión polos golfos: Camps, Matas, Baltar, Fabra, Bárcenas... Defendiólos, a toos, diciendo que yeren inocentes, y toos lo dexaron col culu al aire.

Pero non escarma, engaña. Azorrona poniendo cara de víctima y diz que nun-y tremecerá la mano. Que mano, Mariano, porque dexáronte, en pelota, con una atrás y otra delantre, asina que precisaríes una tercera, que nun tienes, p'allumate con una vela y nun perdete na cuevona de Xénova.

Vuelves el Prestige, utilices la mesma táctica: unos filinos de plastilina… Tonelaes de galipote ye lo que tienes baxo cubierta. Chapapote a millones. A ver cómo sales d'esta, gallegu de Pontevedra. La suerte y la xiripa nun son eternes.

Naide sabe hasta onde pue llegar el filón de mierda

Milio Mariño

Pa esplicar la corrupción, nesti país, yá nun val esi principiu que diz que tou lo va mal pue dir a peor. Equí tou lo que va peor pue dir catastróficu porque cuando unu creía que valtiaremos, en demasía, cupu de sinvergüences y lladroniciu, vuelven apaecer casos nuevos que, mialma, faen imposible calcular hasta ónde pue llegar el filón de mierda.

Lo d'ayer podrá dicise que sí, que ye grave, pero que vien ser lo de siempre… Cuentes en Suiza con millones d’euros a maza, un áticu de luxu mercáu por quien, colos ingresos que declara, nun tendría que tener dineru pa mercalo…

D’alcuerdo, por desgracia, ye lo de siempre. Pero hai más entovía. Hai un Gobiernu qu’indulta a un kamikaze que foi condergáu a trece años de cárcel por conducir pol carril contrariu d'una autopista y matar a una persona y mancar de gravedá a otra. Dalgo que nun s’esplica si nun ye que la prensa nos pon al tantu de que l'abogáu defensor del kamikaze indultáu ye'l fíu del ministru de Xusticia.

¿Hasta onde llegará la nuestra paciencia? Esa ye la entruga.