El mi lio d'esta selmana ye polos xabalís…. Yá sé que
xabalís siempre los hubo… Que vivíen nel monte y un día apaecía unu per equí…
otru día otru per allá, depués yá fueron dos, llueu una manada y agora, dende apocayá,
paez como si vivieren en cualesquier barriu de la ciudá. Atópeslos per tolos
sitios… yá nun respeten na, nin a la policía municipal. El vienres pasáu, nel
Berrón, apaeció una peada de cinco y trés d'ellos truñaron contra un coche
patrulla de la Policía de Siero. Los policíes resultaron ilesos pero casi la
palmen del xustu.
Llevamos tiempu ablucándonos porque los xabalís baxen del
monte y s’averen a les zones urbanes. Asina ye, y yo creo que'l nuesu plasmu
vien de que nun pensamos con mentalidá de xabalí… Pensamos como pensamos y nun mos
ponemos nel so llugar… Fixámosnos namás nel físicu y como nun son mui agraciaos
refugamos que nun son intelixentes. Tamos
enquivocaos, los xabalís son mui llistos. Tienen una gran memoria y anque de
vista anden regular súplenlo col olfatu. A tou eso hai qu’amestar que va tiempu
llegaron a la conclusión de que somos inofensivos… Nun yos facemos na… ¿Qué
razones tendríen pa nun dar un paséu peles zones onde vivimos ?. Nenguna. Asina
que nun hai por qué estrañase de qu'un vienres pela nueche una peada de cinco xabalís
quixeren dar una vuelta pol Berrón. A lo meyor, El Berrón, pa ellos ye un sitiu
d'ambiente…
Yá sé qu'una cosa ye
que dar una vuelta y otra truñar al coche de la policía… Pero quien sabe, igual
lo fixeron en defensa propia… Igual teníen mieu de que-yos fixeren un control
d'alcoholemia.
El problema ye que cada vez hai más xabalís abeyando peles
zones urbanes. Y la preba de que nun se trata d’una casualidá ye que va pocu
sosprendieron a unos cuantos n'Uviéu, nos xardinos de Villa Madalena. Lo cuál
demuestra que tán tan integraos que-yos interesa, como a nós, el pufu que tien l’ayuntamientu
con esi xalé.
La Conseyería de Recursos Naturales calcula que n'Asturies
hai 60.000 Xabalís. Una cifra que desmiente'l Fapas, que diz que nun son
tantos. Non lu sedrán pero, al paecer, hai consensu tocantes a que puen ser 700
los que viven pela redolada d'Uviéu… Y
dalgo habrá que facer…
Los zoólogos y los defensores de los animales proponen que
les soluciones que s'adopten nun sían violentes. Ye fácil dicilo pero si
pidiéramos voluntarios pa que falaren colos xabalís y los convencieren de que
nun baxaren del monte nun creo qu'apaecieren munchos. Lo qu’asocedío en Siero
demuestra que yá nun respeten nin a la Policía Municipal. Y como lo siguiente
sía que tamién truñen a la Guardia Civil… Entós si que yá… Cualesquier día vémoslos
merendando chocolate con churros nuna terraza de la calle Palaciu Valdés.
Milio Mariño
No hay comentarios:
Publicar un comentario
Milio Mariño