El descontrol de los controladores foi un golpe d'Estáu

Milio Mariño

La que prepararon los controladores foi coyonuda pero resulta que los medios, lloñe d'esclariar esti asuntu, amestaron más descontrol y trafullu.
Nunca tal vi que falaren peor y tracamundiándolo too. Falaron de fuelga xabaz cuando la fuelga nin ta convocada nin s'asemeya a lo ficieron los perillanes de la torre control.

Y asina claro, asina vuelta a les andaes de pidir una nueva llei de fuelga y a dicir que los sindicatos nun tienen chapeta nin sentíu común.

Por si la cosa nun tuviera bastante enrrodiellada, hai medios que compararon esti plante de los controladores, que dellos foron al médicu y pidieron la baxa por depresión y otros dixeron que yá ficieren toles hores que teníen que facer esti añu, con aquella fuelga, llegal, que ficieron nel Metru de Madrid y na que'l problema foi que non se punxeron d'alcuerdo colos servicios mínimos.

Pidir un pelín de rigor informativu ye bobada. Equí valse too. El casu ye echái la culpa al Gobiernu. Que dalgo culpa si que tien, pero nun ye culpable de la que se preparó ayeri, que foi como aquel que diz un golpe d'Estáu.

Son concidencies que nun tienen que ver pero'l golpe d'Estáu que dio Pinochet y el que dieron los xenerales en Arxentina, foron precedíos por una fuelga del transporte.