Aquel añu concidió que les eleiciones celebrárense en primavera y ganárenles los conservadores por una mayoría aplastante, pero'l pueblu empezaba a tomar conciencia de que nun tenía sentíu sufrir y callar, aceptando vivir sometíu a la burguesía y la ilesia.
Asina foi qu'el 29 de xunu de 1884, Xuan de la Cuca, que yera'l recitador de L’Amuravela, desenvainó’l sable, llantóse delantre de la imaxe de San Pedro y dixo con voz de truenu:
- ¡Si falta pescáu o pan d’un sablazu vas al suelu, garró llaves del cielu y do-yles a San Xuan!
Dempués de sospresa y el lóxicu revuelu, la reacción foi darréu. El cura paró'l sermón y mandó meter al santu na ilesia, a la par que sentenciaba que nunca más diba celebrase la fiesta.
Los vecinos, pela so parte, retrucaron con división d'opiniones. Dalgunos, los menos, daben-y la razón al cura, pero la mayoría taben con Xuan de la Cuca. Defendíen la so postura y, pa demostralo, cantaben a l’altu la lleva:
- ¡Mientres Cuideiru viva, yá duri la Fuenti'l Cantu, va San Pedru a la Ribera, con todus lus demás Santus!.
L’Amuravela llevaba recitándose en Cuideiru, en presencia de la imaxe de San Pedro, desque en 1569 llegaren unos marineros pixuetos de la conquista de La Florida y saludaren al santu como teníen por vezu saludar al so almirante Don Álvaro, que yera sobrín de Pedro Menéndez.
El ritu repetíase, añu tres añu, de forma escrupulosa. Detrás del tambor y la gaita apaecíen, a llombu de los marineros más populares y meyor puestos, les imaxes de San Pedro, San Francisco y La Virxe del Rosariu, que yeren llevaes en procesión hasta onde taba la llancha. En llegando ellí, a San Pedro, l'únicu que gociaba d'esi fueru, asitiábenlo a popa y recitaben L’Amuravela.
El cura que lo prohibió debía creyer que con quitar que-y dixeren al santu lo que se camentaba na cai acabábense los problemes. Pero, el recitador, como'l mensaxeru, nun tenía culpa de que los marineros tuvieren nuna situación crítica y quixeren que s’oyeren les sos quexes.
Aquel 29 de xunu de 1884, el día que Xuan de la Cuca desenvainó’l sable y alvirtió a San Pedro de que si, en Cuideiru, faltaba pan o pescáu quitaríen-y les llaves del cielu, foi una fecha histórica. Foi l'entamu de munchos años ensin que la imaxe del santu tuviera presente cuando recitaben L’Amuravela. La prohibición duró dende 1885 hasta l’añu 2005. L’Amuravela siguió recitándose col mesmu fervor de siempre pero con San Pedro dientro la ilesia.
Nun sé lo que pensaréis pero como, a la fin, tou se sabe, de pocu debió sirvir qu'a San Pedro lo zarraren pa que nun oyera les quexes. Pa min que siempre debió tar al tantu de los desvelos de los pescadores pixuetos.
Milio Mariño
No hay comentarios:
Publicar un comentario
Milio Mariño