Rajoy el sacristán

Milio Mariño

Mialma daba respiegos, y muncha vergoña ayena, ver a Rajoy, y a la so muyer, esperando na sacristía, de pie y con cara pamestos, que'l Papa pasare por delantre pa saludalo y besái la mano.

Mialma paecíen un matrimoniu d'aquellos que, alló polos años cincuenta, baxaben de la montaña, el día qu'había mercáu, y diben ver al cura pa pidíi dalgún favor : que-yos colocare al fíu mayor de botones nun bancu, o una recomendación pa que-y dieren un estancu a una hermana de la muyer.

Mialma plasmé cuando vi que Rajoy daba-y al Papa un paquetín envueltu en papel de regalu, de colorinos, qu'un fartón, d'esos que siempre van al rau del Santu Padre, entainó a quita-ylo de les manes.

Hai que ver lo bien que-y queda a Rajoy facer de Sacristán.
Caún pa lo que val.