Pagar por ver al Papa

Milio Mariño

Cuesta aceutalo pero nada ye gratis. Y menos en tiempos de crisis que ye cuando'l gastu se mira con llupa y paez espilfarru lo qu'enantes pagaben d'oficiu, ensin entrugar si yera caru o baratu. Valnos, como exemplu, lo que fexo David Cameron cuando'l Papa visitó'l Reinu Uníu.

Cuando aquello Cameron y los Torys, quiero dicir los de dreches de tola vida, plantáronse y dixeron hasta equí llegamos. Lo que teníemos presupuestáu yera que 10 millones d'euros pagábalos el Gobiernu y 8,5 pagábalos el Vaticanu, de moldu que nun queremos saber nada d'eso qu'agora dicen los obispos, que'l presupuestu al nuestru cargu acaba de disparase hasta los 14,5 millones.

Cameron dixo que nun pagaba un euru más y non lo pagó. Asina con un par… Y nun sé yo si sedría por eso, o porque ya taba presvistu, pero decidieron cobrar entrada por asistir a les mises del Papa. Seis euros pola d'Hyde Park, trenta pola de Birminghan y vente pola de Glasgow.
Inoro, dafechu, a quién se-y ocurrió la idea pero, seguru, que dalguién dixo: ¿Nun paga la xente por ver a Messi? Pos el que quiera ver al Papa que pague.

Suena raru pero la relixón ye un asuntu priváu que tien que tar al cargu, namás, de los feligreses. Lo que nun algamo a caltriar ye que, siendo toles mises iguales, el preciu fuere distintu. Val que na misa de Glasgow cantara Susan Boyle pero nes otres… En cualquier casu dalguna esplicación habrá. Y, lóxica por supuestu.

Esplicaciones aparte, una midía asina, que nel Reinu Uníu causó ciertu revuelu, equí nun sedría pa imaxinar. Equí vemos normal pagar por un cabu d'añu, una boda o un bautizu, pero pagar por ver al Papa seguru que nos paez munchu. Y, nun vayan pensar que sal gratis, ver al Papa cuesta lo suyu. Velo en Santiago y en Barcelona naide, entovía s'atrevió a dicir lo que-y pue costar al erariu público. De toles maneres nun creo que llegue a la friolera de 60 millones d'euros, que ye lo que dicen los socialistes que costó la visita del Papa a Valencia. Cantidá que'l PP niégase a cuantificar y de la que namás reconoció, a requerimientu del xuez, que la retrasmisión, pola TV Valenciana, costó 12 millones d'euros y que dos factures, una de 153.700 euros y otra de 400.000, correspuenden al tapiz de flores que colocaron frente a la sede arzobispal y a les que colocaron en parte del recorríu.

Total que cuatro años depués entá naide sabe lo que costó la visita del Papa a Valencia. Cosa que, dende llueu, nun pasó, nin pue pasar, en dengún otru sitiu.

Axustase al presupuestu, en cualquier país democráticu, ye ser seriu y responsable pero equí sedría otra cosa. Equí diríen que fixar un presupuestu y siguilo al pie de la lletra sedría persiguir y maltratar a la ilesia.
Lo nuestru, el presupuestu de los nuesos políticos, pal viaxe del Papa a Santiago y Barcelona, seguru que volvió ser lo que foi en Valencia:Pal Papa lo que faiga falta. Lo cuál non s'atien a les normes contables pero casa perfechamente colo que yá tien dixo, el Papa: “Los bonos cristianos deberíen pensar menos na xusticia social y más na resurreición de la carne”.