Señalar a los diputaos ye hixénicu y necesariu

Milio Mariño

Ayeri debatiase en munchos foros, na tele y na radio, la iniciativa de Stop Desaucios d'entamar una campaña pa señalar a los diputaos públicamente, como culpables "del xenocidiu financieru”, si nun salen alantre les sos propuestes.

Como midía de presión la plataforma virtual Oiga.me, aperiada por hackers del 15-M, llevó a cabu una unviada masiva de 200.000 mails a los diputaos hasta empanturriar los sos teléfonos móviles y ordenadores.

Dependiendo de cómo se desendolque la llei y el resultáu final, si nun se recueyen les principales demandes la protesta va pasar de la rede a la cai y lo que se propón ye señalar a los diputaos nos sos barrios, nos restoranes a los que van comer y nos chigres onde tomen cañes.

Ha-ylos qu’opinen qu'eso nun debería facese, pero yo toi d'alcuerdu con que la xente yos eche l’aliendu enriba. Paezme que ye necesariu acabar cola impunidá. Hasta agora los diputaos nun respondíen nunca ante los electores, namás se debíen al so partíu, y eso tien qu'acabase.

Ye increíble que sos señoríes nun protesten cuando los que presionen son los banqueros y los empresarios y pongan el glayíu nel cielu cuando lo faen los que los elixeron.