El deu gafu de los fachas

Milio Mariño

Ye malu que nos roben ya ye malu que nos mientan, pero entá ye peor el despreciu que sienten por nós y l'actitú cola que nos traten. Esi biecu sobeyu de miranos percima’l costazu, ablucaos de que los critiquemos y nun doblemos l'espinazu pa da-yos les gracies.

Viendo como son, conociéndolos, güei tarán allucinando col históricu cuelgue de togues convocáu por cinco asociaciones, de xueces y fiscales, que protesten contra l'ataque a la so independencia, contra les tases xudiciales, la privatización del Rexistru Civil, la falta de medios y los indultos a maza.

La novedá pal Gobiernu ye que los que, piensen, tendríen que ser de la so cuerda yos faigan una fuelga. Que la faigan los trabayadores, quier dicise la canaya, inda tien un pase pero lo de los xueces y los fiscales paez-yos como lo de los artistes y lo de cualesquier que viva mediu bien: Una indecencia, daqué inadmisible.

Siéntense tan ofendíos que, dacuando, nun puen contenese y escápase-yos el deu tiesu apuntando, gafu, pal cielu. Va dos díes escapóse-y a Bárcenas, pero non mos engañemos, Trillo, Aznar y el Rei tamién protagonizaron, en público, esa pretendía muestra de superioridá que pon n'evidencia la baxeza de los autores.