Milio Mariño
El mio camentario de los xueves nel programa Noche tras Noche de la RPA
El mi lio d'esta selmana ye pola educación y el bon rollu que, equí n'Asturies, tán amosando dalgunos de los que roben como se fixo siempre: quiero dicir de pie y usando navaya o pistola. Los otros, los que roben sentaos nun despachu, detrás d’un ordenador, yá sabíemos que yeren educaos pero mui sinvergüences.
Alló caún lo que piense, pero a mi paezme perbien que los lladrones guarden les formes. Que faigan como esi atracador que'l llunes pasáu presentóse na sucursal de la Caxa Rural, na avenida Manuel Llaneza de Xixón, y nun entró dando voces y diciendo: Esto ye un atracu. Entró tranquilamente, púnxose a la cola y esperó la vez. Foi tan discretu, inclusu al amosar la pistola y pidir al caxeru que-y diera lo que tenía, unos 2.000 euros, que'l paisanu que diba detrás dixo-y a la policía que nin s'enterara de que dieren un atracu.
El casu que va pocu más de dos meses tamién se dio otra situación paecía. La d’un rapaz que foi mui educáu cuando intentó atracar una autoescuela del barriu San Llázaro, n'Uviéu. Esta vez, anque l'atracador llevaba un gorru y una bufanda que-y tapaben la cara, debía ser pol fríu más que por otra cosa, porque pidió-y esculpes a quien diba ser la so víctima, la muyer qu'atendía na recepción, cuando esta-y dixo qu’ellí, n’autoescuela, nun teníen dineru nin caxa fuerte y qu’ella nel bolsu malpenes tenía cuatro euros y calderilla.
La muyer cuntó llueu a la policía que’l rapaz pidió-y esculpes y marchó coles manes en bolsu. Namás-y faltó dicir: perdone que sía tan torpe. Nun se-y ocurre a naide, nin al qu’asó la mantega, atracar una autoescuela: merezo esto y más que me pase.
Esti tipu d’atracadores, pa min que non lu piensen, que-yos da una ventolada y actuen movíos por un enclín que los ciega porque según datos de la policía, la recaudación d'estos atracos nun pasa, nunca, de 12.000 euros. Cantidá a la que, si-y restamos los gastos: la compra de pistoles, gorros, pasamontañes y vehículu pal desplazamientu, dexa la mano d'obra con un beneficiu netu menor que'l de cualquier fontaneru o téunicu d'eleutrodomésticos que trabaye a domiciliu. Nun ye pa nada rentable, sobremanera si tenemos en cuenta que pue dir a la cárcel y cargar con una pena de 30 a 40 años, namás por eso, ensin matar a naide.
Ye más rentable la corrupción. La media de dineru robáu, nestos casos, ye de 1,2 millones d'euros per participante. Y, a diferencia de los otros atracadores, fueraparte de nun correr nengún riesgu, casi siempre terminen pagando una multa ya ingresando por poco tiempu na cárcel.
Dios me llibre de xustificar que se robe, d’una manera o d’otra, nin de querer influyir nes preferencies de los lladrones. Camiéntolo porque mialma me llamó l’atención qu’esos lladrones, d’Uviéu y Xixón, fueren tan educaos. Pa min que cayeron na cuenta de que los modales, y non lo que se robe, ye lo que da mala fama al oficiu.
El mio camentario de los xueves nel programa Noche tras Noche de la RPA
Alló caún lo que piense, pero a mi paezme perbien que los lladrones guarden les formes. Que faigan como esi atracador que'l llunes pasáu presentóse na sucursal de la Caxa Rural, na avenida Manuel Llaneza de Xixón, y nun entró dando voces y diciendo: Esto ye un atracu. Entró tranquilamente, púnxose a la cola y esperó la vez. Foi tan discretu, inclusu al amosar la pistola y pidir al caxeru que-y diera lo que tenía, unos 2.000 euros, que'l paisanu que diba detrás dixo-y a la policía que nin s'enterara de que dieren un atracu.
El casu que va pocu más de dos meses tamién se dio otra situación paecía. La d’un rapaz que foi mui educáu cuando intentó atracar una autoescuela del barriu San Llázaro, n'Uviéu. Esta vez, anque l'atracador llevaba un gorru y una bufanda que-y tapaben la cara, debía ser pol fríu más que por otra cosa, porque pidió-y esculpes a quien diba ser la so víctima, la muyer qu'atendía na recepción, cuando esta-y dixo qu’ellí, n’autoescuela, nun teníen dineru nin caxa fuerte y qu’ella nel bolsu malpenes tenía cuatro euros y calderilla.
La muyer cuntó llueu a la policía que’l rapaz pidió-y esculpes y marchó coles manes en bolsu. Namás-y faltó dicir: perdone que sía tan torpe. Nun se-y ocurre a naide, nin al qu’asó la mantega, atracar una autoescuela: merezo esto y más que me pase.
Esti tipu d’atracadores, pa min que non lu piensen, que-yos da una ventolada y actuen movíos por un enclín que los ciega porque según datos de la policía, la recaudación d'estos atracos nun pasa, nunca, de 12.000 euros. Cantidá a la que, si-y restamos los gastos: la compra de pistoles, gorros, pasamontañes y vehículu pal desplazamientu, dexa la mano d'obra con un beneficiu netu menor que'l de cualquier fontaneru o téunicu d'eleutrodomésticos que trabaye a domiciliu. Nun ye pa nada rentable, sobremanera si tenemos en cuenta que pue dir a la cárcel y cargar con una pena de 30 a 40 años, namás por eso, ensin matar a naide.
Ye más rentable la corrupción. La media de dineru robáu, nestos casos, ye de 1,2 millones d'euros per participante. Y, a diferencia de los otros atracadores, fueraparte de nun correr nengún riesgu, casi siempre terminen pagando una multa ya ingresando por poco tiempu na cárcel.
Dios me llibre de xustificar que se robe, d’una manera o d’otra, nin de querer influyir nes preferencies de los lladrones. Camiéntolo porque mialma me llamó l’atención qu’esos lladrones, d’Uviéu y Xixón, fueren tan educaos. Pa min que cayeron na cuenta de que los modales, y non lo que se robe, ye lo que da mala fama al oficiu.
No hay comentarios:
Publicar un comentario
Milio Mariño