Facese una Selfie, otra forma de masturbase

Milio Mariño
La mio collaboración nel Programa Noche tras Noche, de la RTPA

El mi lio d'esta selmana vien dau por una pallabra: Selfie. Pallabra inglesa que tamos oyendo a toles hores y casi podemos adoptala como si fuere asturiana. Dígolo porque si l’analizamos resulta que ta compuesta por Se, de semeya, ele de lo que queramos y fi de fixo lo que nun pue facer naide más qu'unu mesmu. Un autoretratu…

El casu que Selfie, pal pernomáu diccionariu Oxford English, foi la pallabra del 2013. Esa ye la historia, que nun podemos distrayenos un momentu porque yo, que creyía que taba al tantu de casi too, nun supi lo que sinificaba Selfie hasta va cuatro díes.

La primer vegada qu’oyí… voi faceme una Selfie, pensé que yera otra cosa. Pensé qu’agora llamaben Selfie a lo que tola vida llamamos yá saben como… Deber ser que soi tan vulgar y tan zafiu que namás se m’ocurren maldaes. Anque buenu, después d’enterame del significáu que-y dan a la palabra en custión tampoco andaba tan descamináu, pos los espertos reconocen que Selfie vien ser dalgo asina como otra forma de masturbase… Una masturbación fotográfica, eso si, que consiste en dase gustu a unu mesmu con un aparatu propiu, nesti casu electrónicu.

Facese una Selfie ta reconocíu asina, como un enclín narcisista, una autocomplacencia que fai furor. Ye tan grande l'afición que yá fixeron estudios que confirmen eso… Que lo de la Selfie asemeyase muncho a masturbase, pos nun importa qu'unu sía más guapu o más feu, nin el llugar onde s'atope. Importa la necesidá y la inmediatez. El facelo de forma espontánea cuando y onde nos de pola gana: Nel bañu, na cocina o inclusu nun funeral, como va pocu vimos que fixo Obama nel funeral de Mandela.

Otru datu que nos lleva a confirmar lo que diximos ye que’l Centru d'Investigación Pew, d'Estaos Xuníos, reveló qu'el 91 per cientu de los adolescentes fáense una Selfie, práuticamente, tolos díes.

L'enclín paez tan imparable que ta dando llugar a un ampliu alderique. Hai quién ve nesti comportamientu, como nel otru, un peligru potencial d'adicción o'l síntoma de dalgún trestornu. Pero tamién hai espertos que sostienen que nun hai que demonizalo pos taríamos ante una nueva forma de comunicación avalada pol aspeutu lúdicu del fenómenu. Ye más, en dellos ambientes, camienten que si non lu faes, si nun faes, dacuando en vez, una Selfie, mírente atravesáu, como un bicho raru.

Asina que nada… Si como dicen los espertos, facese una Selfie potencia l'autoestima y ayudanos muncho a sentinos más seguros, sobra cualquier prevención o reparu. Que cada cuál faiga les Selfies que-y de pola gana… Son un placer efímeru, que dura unos segundos y, enriba ye bien baratu. Lo único qu'esta forma de masturbase, a diferencia de la otra, d’aquella de la que falaben los cures, si la prautiques muncho, si que pue afeutate a la vista, pue dexate bizcu.

El Bitcoin y los Belarminos

Milio Mariño
(La mio colaboración, nel programa Noche tras noche, de la RTPA)

El mi lio d'esta selmana trata del Bitcoin, la moneda virtual más famosa y mediática del mundu, una moneda que, según les últimes informaciones, atopase n'estáu críticu después de pasar de la euforia a la incertidume y el caos.

Quiero falar de Bitcoin, qu'hasta va pocu desconocía, porque, na mio opinión, paezse muncho a los Belarminos, aquella moneda que tuvimos los asturianos anque nun fuera namás que por unos meses.

Ehí queda eso, pa que llueu dalgunes autonomíes presuman del so pasáu históricu. Podrán presumir lo que quieran pero nun hai denguna que s'avere, nin de lloñe, a lo qu foimos nos, alló por 1937, cuando’l Conseyu Soberanu d'Asturies y Llión, dempués de proclamase independiente, non solo acuñó la so propia moneda sinón que tamién estableció un serviciu propiu de correos, una policía, y hasta un exércitu que tenía, inclusu, marina de guerra.

Cuenten que'l Bitcoin vio la lluz en 2009, como resultáu d'un suañu de Satoshi Nakamoto, na so idea de crear un sistema de pagu electrónicu pa internet, descentralizáu ya independiente de cualquier tipu d'autoridá, que pudiera ser tresferíu de forma rápida y ensin apenes costos.

Otru suañu, paecíu al de Nakamoto, debió ser lo que llevó a Belarmino Tomás a crear aquella moneda asturiana que, nuna primer fase, componíase de tres billetes, de 25, 50 y 100, impresos en papel con marques a l'agua, diseñaos por Germán García Robles y fechos por El Control de Litografía del Sindicatu Únicu del Ramu de les Artes Gráfiques, imprenta asitiada nel barriu xixonés del Natahoyu.

Aquellos billetes, los Belarminos, dicíen que yeren infalsificables debíu al diseñu, la calidá del papel y los dibuxos; toos de motivos asturianos sobre la minería, la pesca, el campu y la ciudá.

Polo que pudimos saber estos díes, el Bitcoin ye una moneda que nun pertenez a nengún país nin ta sofitada por nengún bancu central. La nuesa, los Belarminos, anque desiguida perdiera’l so valor, sí cuntaba col apoyu de lo qu’entós yera’l bancu de la república, pero eso ye lo de menos pos les monedes siempre tienen un respaldu relativu. Un día llevánteste y onde creíes que teníes cien resulta que tíes setenta. Quier dicise que tamién les monedes reales, les de cursu llegal, tienen siempre un porcentaxe d'irrealidá.

Bitcoin significa, al paecer, "moneda de bits". Un material del que ta fecha la realidá dixital, mientres que la otra, la realidá analóxica, ta fecha d'átomos.

Cuando salieron los Belarminos, alló por 1937, entá faltaba un porrón d'años pa que se conociere la realidá virtual y apaeciera’l Bitcoin, la moneda que non lo ye. Pero esa moneda y los Belarminos aseméyense muncho. Sobre too porque la nuestra tamién pue considerase virtual. Lo cuál demuestra que, anque nun esistiera La Nube, yá había xente qu’echaba la imaxinación a volar y volaba percima de la realidá analóxica, o por más arriba entovía.

Tiranos horteras

Milio Mariño

La lluvia, el frio y el viento invitan a quedarse en casa y hojear viejos libros que siempre deparan sorpresas. Sorpresas y coincidencias pues la semana pasada di con uno, La Hora de todos y la Fortuna con seso, en el que Francisco de Quevedo dice que siempre es más fácil matar al tirano que sufrirlo.

La reflexión, además de acertada, no pudo ser más oportuna. Sobre todo porque aquel día, y ahí la coincidencia, anunciaron la destitución de Viktor Yanukovich.

A pesar del tiempo, casi cuatrocientos años, Quevedo habla en su libro de una variación sobre el tema del mundo al revés, en el que la Fortuna recobra el juicio y da a cada persona lo que realmente merece, provocando tan gran trastorno que el padre de los dioses debe devolverlo todo a su primitivo desorden. Pero Quevedo no solo habla de eso, también se refiere al afán desmedido de los tiranos por poseerlo todo. Un afán que, si ya se daba entonces, aún pervive pues hemos vuelto a ver imágenes del despilfarro sin que por ello deje de sorprendernos la tozudez que tienen los tiranos por acaparar lo estrambótico y lo terriblemente hortera. Ahí está la fortuna del depuesto Yanukovich, que ha vuelto a las andadas de otros colegas suyos, aficionados a los grifos de oro, los zoológicos privados, los coches de lujo, el mármol, los muebles de maderas nobles y todo lo que se nos ocurra que pueden acaparar quienes parecen afectados por el síndrome de un Diógenes acaudalado y de un mal gusto que causa sonrojo.

Quizá, los psicólogos, deberían explicar por qué sé repite esa especie de banalidad obtusa, ese afán acumulador que tienen los ricos muy ricos, los tiranos, los estafadores y los narcos.

Seguro que alguien recordará cuando, allá por 1986, Imelda Marcos abandonó Filipinas, hacia el exilio, y los que entraron en su casa encontraron 2000 pares de zapatos, además de ingentes cantidades de joyas, bolsos y vestidos. Gadafi también iba por ahí con su look particular y una corte de criados, jaimas y caballos, digna de las Mil y una Noches. No les digo nada Idi Amín, que se hizo nombrar Rey de Escocia y, de vez en cuando, aparecía vestido como Jacobo IV.

La nómina de tiranos, estafadores y ricos muy ricos, que acaparan tesoros y horteradas, es tan larga que incluye casos tan peculiares como ese reyezuelo de Marbella, Juan Antonio Roca, que tenía más de diez cuadros de Picasso y Joan Miró, avión y helicóptero privado, una colección de 43 carruajes históricos, ganadería de reses bravas, cuadra de 100 caballos de pura raza española, tres palacios, cuatro fincas, hoteles y varios osos y elefantes disecados.

El exhibicionismo económico parece no tener límites. Cada poco aparecen tiranos y estafadores, adictos al poder y a la ostentación económica, cuyas vidas transcurren entre yates, jets privados, apartamentos de lujo, mujeres hermosas, champán, caviar y todo lo que el mercado es capaz de ofrecer no para proporcionarles placer sino para que se sientan objeto de la envidia que, entienden, genera que veamos todo lo que poseen. Esa debe ser, a mi juicio, la única explicación. Lo que no saben es que, lejos de provocar envidia, lo que provocan es una profunda tristeza. Tristeza e indignación, pues es indignante que hundan en la miseria a miles de personas para obtener beneficios millonarios y gastarlos en chorradas.

Milio Mariño/ Artículo de Opinión/ Diario La Nueva España

Antroxu

Milio Mariño

Collaboración nel programa Noche tras Noche
de la RPA, la radio pública del Principáu.

El mi lio d'esta selmana nun puede ser otru qu'el del Antroxu, esa fiesta tan asturiana qu'entama güei mesmu col enfotu de que podamos divertinos ensin tasa y comer y beber a mansalva. Comer carne crudo, de muyer o de home… Y también, carne de gochu, esa sí, cocinada… Y llambionaes comu les casadielles, les teresines, los frixuelos, les rosquies, les bollines y tolos dulces del mundu.

Nun fai falta ser aldovino pa saber que la cosa ta xodía, la crisis ye criminal, pero eso nun quita pa nun divertinos, nun reínos, nun poner les coses al aviesu, nun baxar al de riba a ras del suelu y nun upar al d’abaxo al tronu de lo más altu.

Los díes que vienen son pa eso…. P'abolir cargos, alcurnies ya penitencies… Pa facer de la capa un sayu y de la burlla una fiesta, eso si, ensin cayer nel despreciu.

Son dies nos que'l pueblu llanu, constituyíu en reciella, llibertá ya independencia, remontase contra tolo que-y cafia pa reyise de si mesmu y de los que presumen de ser mui serios.

L’antroxu ye eso… Esa ye la so ciencia… Que naide piense que se trata d’un botellón a lo llocu, ensin otru aquello qu’enfilase y lliala parda, porque enxamás va sentir la maxa de la so tradición, nin el raigañu de los sos valores más puros… Valores como l'allegría, la llibertá d'espresión, el respetu polo desigual, l'optimismu, la crítica constructiva, la llocura y la capacidá de suañar en voz alta… que tanta falta nos fai, nestos tiempos que cuerren.

Y, más vos digo… Dellos, quiciás los que nun conocen nin entienden el sentimientu del antroxu, piensen qu'esta fiesta consiste en salir a la cai con una careta…. con un mazcaritu puestu….Mialma ye lo que piensen, que la hestoria ye salir disfrazaos… Enquivoquense de mediu a mediu… El verdaderu sentíu del Antroxu ye xustu lo contrario… Ye arrincar les caretes, los prexuicios, los complexos, les frustraciones, les poses sociales y los disfraces q’usamos el restu del añu…. Ye salir a la cai ensin disfraz dengunu y exercer la nuesa más pura llibertá, siquier, per unes hores. Ye arrincanos la máscara y ser como somos.

Xustu pa eso, pa festexar lo que nun festexamos de cutiu, yá ta tou dispuesto… Nun falta de nada…. Y si falta nun tenéis más que pidilo… Ye too gratis… Refiérome a la folixa, el bon humor, la chancia y el xolgoriu….

Pásalo bien estos díes ye gratis… Gratis y pa tol mundo, ensin distinciones…. Pa homes y muyeres… palombos coxos, pites ciegues…..y lo que cuadre.

Asina que yá lo sabéis…. Dende agora mesmu y hasta qu’enterremos a la sardina…¡ Que los que lloren sía de risa!!… ¡¡Y los que nun se rían porque, daveres, nun-yos da pola gana!!…

Asturianos ya cazurros xuntos pola financiación autonómica

Milio Mariño
(Collaboración nel Programa de Radio Noche tras Noche de la RTPA)

El mi lio d'esta selmana ye a cuenta d'esa alianza d'Asturies con Castiella y Lleón pol aquello de la financiación autonómica. Alianza a la que podríen sumase otres Comunidaes que s'enfrenten al mesmu problema: El d’una financiación inxusta basada nun repartu nacíu d'unos alcuerdos nos que namás se tuvo en cuenta contentar a los que podíen garantizar la estabilidá del Gobiernu de Madrid.

Nesto nun hai diferencies, tantu los del PP como los del PSOE cedieron a les presiones de los vascos y, sobremanera, de los catalanes, que la so última fazaña foi que-yos reconocieren una partida de más de 230 millones d’euros, de financiación estra, pa desarrollar la difusión del catalán.

Menuda bicoca, 230 millones del ala, pa promocionar el catalán y cero patateru pal asturianu. Anque buenu, toi seguru que, pal asturianu, el nuestru Gobiernin nun pidió un ris, pero tráigolo a colación como exemplu de despropósitu de financiación autonómica.

Lo malu de tou esto ye que nun son, solo, los catalanes los que tiren del tetu. El sistema de conciertu especial aplicáu en Navarra y el País Vascu ye una reliquia histórica qu’entá se caltién. Nun esiste nada que se-y paeza en nengún otru país d’Europa. Son unos privilexos propios de la dómina feudal qu’atenten contra la cohesión de cualquier estáu.

Asina les coses, el gobiernu d'Asturies, quier aprovechar la revisión del sistema de financiación autonómica, pa plantegar que nun se pue caltener la situación que dicíamos antes. Y nun ye l’únicu: Castiella y Llión ya dixo que taba d’alcuerdo.

Castiella y Llión tamién apoyó la postura d’Asturies nes negociaciones previes a la reforma del sistema de financiación de 2008, una postura a la que se sumaron Galicia y Cantabria y, entós, llamaron el pauto del Noroeste.

Nun sé yo cómo verán Rajoy y Montoro esta alianza d’asturianos y cazurros pero pienso que deberíen tomala en serio porque dalgo paecíu foi lo que provocó la rebelión de Pelayo.

Pelayo llevantóse contra los moros a cuenta de los impuestos que pretendía recaudar Munuza, en nome del Califatu de Córdoba. Un pocu pa Córdoba y un plizcu pa él, pos ante los reproches que-y fexo Pelayo, camienten que Munuza xustificóse con esta frase: Quien recueye la miel tien drechu a chupase los deos.

Ehí queda eso, pero siguiendo colo d’agora, el Principáu nun reclama que s’eliminen dafechu los cupos vascu y navarru, reclama una reconsideración de los mesmos, porque na actualidá nun tan apurriendo, a la caxa común del Estáu, les cantidaes qu’apurrimos el restu.



El nuevu sistema debería ser un modelu pensáu pa tol país y toles Comunidaes por igual, y non un modelu a la carta p'atender les esixencies d’unos ya inorar les de los demás. Yá ta bien de privilexos. Por eso que me paez positivu que’l nuestru Gobiernin vaya alantre cola propuesta y cola alianza de los cazurros. Nun tamos falando del fueru ol güevu… Falamos de muncho más: del fueru, el güevu y los cuartos.

Visitar la catedral ye más caru que dios

Milio Mariño

El Mi lio d'esta selmana ye a cuenta de lo que va costar, a partir d'abril, visitar la catedral d'Uviéu: siete euros al que vaya solu o en pareya y seis al que vaya en grupu. De los pensionistes, los paraos y los neños nun dicen nada. Asina que, pa m’idea, nun hai esceiciones, van tener que pagar siete euros como tou quisque.

Cada vez queden menos coses gratis. Como diz un amigu mio, a Gratis va tiempu que lu metieron presu. Yá nin siquier podemos esfrutar d'un patrimoniu que ye de toos, y qu'amás restaurase con fondos públicos. Un patrimoniu que si queremos velo, empiecen cobrándonos un euru, como al descuidu, y naide diz nada, pol aquello de qu’un euru nun va a dengún sitiu, pero depués atopámosnos con una xubida como esta, na menos que del setecientos por cientu.

Paez imposible que dalguién puea xustificar una xubida asina, pero pa la ilesia nun hai imposibles, la preba ye que’l Dean dixo, en declaraciones a la prensa, que si xuben les entraes a siete euros ye pa «dignificar» el turismu n'Uviéu.

Diz el Dean que lo qu'hai agora, la entrada a un euru, ye una chambonada. Por eso la ponen más cara porque tienen l’enfotu de que’l nuevu preciu, va dignificar el turismu y facilitar una visita turística de calidá.

Nun sabía yo que'l turismu dignificase si los turistes paguen siete euros por visitar una ilesia. Claro que tampoco sabía que los turistes de mochila grande y cartera pequeña nun algamen dignidá bastante como pa visitar la catedral d'Uviéu.

Pero buenu, que pongan esi preciu por visitar la catedral, a mi paezme que pue ser mui beneficiosu pa los negocios d'hostelería, pos imaxino que van ser munchos los turistes qu’enantes de pagar siete euros, van sentase nuna terraza a tomar una caña o una botellina de sidra a la salú del obispu.

Nun creo que, a siete euros, vuelvan a repetir el númberu de visites del añu pasáu, que según dixeron foi, na menos, que d’ochenta y cuatro mil persones.

Menuda caxa, perres como borra… Eso debieron de pensar el dean, l'Arzobispu y el Cabildu, que de matemátiques igual van xustos pero como saben llatín abondo, seguru qu’echaron cuentes y calcularon que si lo qu'hasta agora costaba un euru lo poníen a siete, y manteníen el númberu de visites, pasaríen de recaudar 84.000 euros al añu a recaudar 588.000, casi cien millones de pesetes.

Cien millones, que lo mesmu suena mui fuerte dicir que son de dineru negru, pero naide sabe’l color que meyor-y cuadra, pos les entraes nun tán sometíes a nengún control, nun paguen IVA y nun tienen que rindir cuentes a Facienda nin a dengún organismu públicu del Estáu. Ye dineru llimpiu de polvu y paya, dineru del obispu que, si quier, nun tien que dar cuentes tampoco, nin a la propia ilesia. Con eso ta dicho tou… Buenu non… faltame dicir una cosa: Qué dios los perdone.

Colaboración Programa Noche tras Noche, RTPA

Les foles vagamundies

Milio Mariño

El comentariu d'esta selmana ye a cuenta de les cuatro alertes roxes, por grandes foles, que llevamos nestos primeros 36 díes del añu. Unes foles que nos nuesos puertos arrincaron muries y escolleres, fundieron barcos y arramplaron con cuantu había.

Les foles xigantes, que reciben el nome de foles vagamundies o foles monstruu, son foles que nun se correspuenden col estáu de la mar. Y esplícome. Estos díes tan rexistrándose foles de más de 11 metros, lo cuál entra dientro de l’altura que pue algamar una fola en casu de tormenta. Otra cosa son les foles de 20 metros, o más, como la qu’estos díes acaben de rexistrar cerca del cabu Peñes, foles que hasta va pocu los científicos aseguraben yeren tan escases que podíen apaecer una cada 10.000 años. Según los científicos, eses foles namás esistíen na imaxinación de los marineros, pero imáxenes de satélite, recientes, demostraron que los marineros nun cuntaben troles sinón que dicíen la verdá.

El 24 de xineru de 2009 la boya Augusto González de Linares, asitiada a 22 milles al norte de Santander rexistró una fola de 26,13 metros, equivalente a un edificiu de 8 plantes.

Cuesta-yos reconocelo pero, pa los científicos, inda ye un misteriu que, de secute, surda una fola, el doble de grande que'l restu. Asina que si, pa ellos, entá güei ye un misteriu, non m’estraña que, va unos sieglos, los navegantes creyeren qu’eses foles yeren cosa de los demonios marinos.

Lóxicu porque cuando nin la ciencia nin el sentíu son a esplicar dalgo, namás queda recurrir a lo sobrenatural. Lo malu que, nesti casu, según los teólogos, los demonios tarrecen metese na mar. Tienen-y tantu mieu que cuando tán obligaos a facer una travesía fáenla acomodaos nel cuerpu d'un humanu, sobremanera nel de les muyeres, eso dicía la Inquisición nel sieglu XVI.

Esplicaben aquellos teólogos que los demonios tarrecen metese na mar por dos razones: Primeru porque tan en caldia y denunciaríalos el fumu y, segundu, porque produciríase un chirríu igual que cuando metemos un tizón nun calderu con agua.

Nun sé a vosotros pero, a min, paécenme dos razones de pesu. Pero claro, si los científicos nun son a esplicar por qué se producen eses foles xigantes y los teólogos dicen que tampoco ye cosa del demoniu, l’únicu que nos queda ye la teoría de les catástrofes, de René Tom. Esa que vulgarmente se conoz como la gota que cuelma’l vasu. La mínima gota que fai que l'agua s’esborde o q’un edificiu se venga abaxo. Que vien ser, más o menos, lo que pasó nel barriu de Gamonal.

Pa min esi ye’l quiz. Si dalguién creyía que la mar diba aceutar la nueva Llei de Costes ensin protestar taba enquivocáu. La mar ponse gafa porque non la quier. De mou que yá ta tardando Rajoy en retirar esa llei. En cuantu que la retire apuesto a que la mar vuelve a quedar como un platu.

(Comentariu Selmanal nel programa de Radiu, de la RTPA, Noche tras Noche)